Shteti ku 45% e të rinjve kanë mendime për vetëvrasje

Pothuajse një në dy të rinj kanë pasur mendime për vetëvrasje, tha një organizatë joqeveritare me bazë në Tokio bazuar një sondazh të kryer në Japoni, duke bërë thirrje për ndërgjegjësim më të madh publik për të parandaluar vetëvrasjen.

Nga 14.555 persona të moshës 18 deri në 29 vjeç të anketuar nga Fondacioni Nippon, 44.8% kishin përjetuar ide vetëvrasëse përballë problemeve të tilla si marrëdhëniet e vështira me njerëzit e afërt, ngacmimet dhe shqetësimet për shtigjet e ardhshme arsimore ose të karrierës.

Nga 44.8%, 40% thanë se kishin tentuar vetëvrasje ose kishin ndërmarrë disa hapa drejt përgatitjes për të vrarë veten.

Traumat, të tilla si nga abuzimi seksual dhe ngacmimi, luanin rol të madh drejt prirjeve të tilla.

Fondacioni publikoi rezultatet në prill pas përpilimit të të dhënave nga një sondazh online që kreu nga 10 deri më 18 nëntor.

Në Japoni, vetëvrasja ishte shkaku kryesor i vdekjes tek të rinjtë për të dy gjinitë në vitet 2019, 2020 dhe 2021, tregojnë të dhënat e ministrisë së Shëndetësisë. Në ato vite, sipas policisë, 2117, 2521 dhe 2611 në grupmoshën 20 deri në 29 vjeç vranë veten.

Në vitin 2022, 2483 njerëz në atë grupmoshë kryen vetëvrasje. Sipas anketës së Fondacionit Nippon, një në shtatë persona të anketuar kishte përjetuar dhunë seksuale. Ata kishin 37 pikë përqindje më shumë gjasa të mendonin për vetëvrasje.

Organizata tha gjithashtu se njerëzit transgjinorë kanë më shumë gjasa të kenë përjetuar sulme seksuale dhe ide më të mëdha vetëvrasëse sesa bashkëmoshatarët e tyre.

Më shumë se gjysma e atyre që konsideruan vetëvrasje nuk folën me askënd lidhur me këtë çështje, zbuloi organizata, me arsyen kryesore se nuk mendonin se ishte diçka që mund të diskutonin, raporton Kyodo.

Fondacioni vuri në dukje se shumica e atyre të anketuarve që nuk kishin përjetuar mendime vetëvrasëse nuk ishin në dijeni të organizatave publike të dobishme.