“Basha di mbi 21 janarin”, Hoxha: SPAK-u të hetojë mbi rastin e ish-zyrtarit të FBI, të thirret Rama

Gazetari Artan Hoxha tha se nëse nuk do të ishte publikuar videoja mbi 21 janarit, ditën e ngjarjes, të nesërmen 6 drejtues të opozitës do të ishin në burg. Duke folur në “Arnautistan” në MCN Tv Hoxha tha se Lulzim Basha di mbi ngjarjen, ndërsa solli në vëmendje replikat mes ish-kreut të PD dhe Berishës.

Duhet ta lëmë pas pandëshkueshmërinë, kanë vrarë njerëz, vranë shpirtin e protestës. Është maskara ai që i solli, se kështu tha, po mirë ti për çfarë je?! Për t’i vrarë këta?! Ai ishte një pushkatim publik. Si mund të vrasësh në atë farë feje?! A e di kush e fajëson Berishën në atë histori? Mënyra se si fshehu gjurmët, si mori në mbrojtje vrasësit. Kjo bën fajësimin e Berishës. Unë kam nxjerr urdhrin e atij që ishte me sy të nxirë. Se kush ia nxiu syrin?!

Basha sigurisht që di. Prandaj është i rëndësishëm në këtë ngjarje. Nuk ka dëshmuar kurrë. Është akuzuar edhe nga Berisha gjatë debatit për shpalljen non grata. Berisha e akuzoi Bashën që së bashku me Ramën, për shkak të marrëveshjes së tyre, sipas tij vrasjet u bënë nga një strukturë që komandohej nga Basha. Basha nga ana tjetër tha që disponoj informacione dhe nuk është ashtu siç është thënë. Por edhe Basha pas asaj e qepi gojën. Edhe përgjegjësia e Ramës duhet të dalë. Duhet të mbajë përgjegjësi ai që merr jetë të pafajshme.

Nga wikiliksi u hapën kabllogramet. Nga Shqipëria kishte shkuar një email nga Rama drejtuar Sorosit, që të përdorte autoritetin e tij në Amerikë që të dërgonte një negociator për të shtensionuar situatën në Shqipëri. Nëse ajo video nuk dilte, mëngjesi i ditës tjetër do t’i gjente 6 drejtues të opozitës në burg”.

Hoxha tha se këtë e sheh si mundësinë e fundit që autoritetet tona të bëjnë drejtësi për 21 janarin.

Lidhur me dëshminë në Prokurori, Hoxha u shpreh:

Jam thirrur të hënën në Prokurori. Kam dhënë informacionin që disponoj. U kam dhënë një lloj orientimi mbi informacionin dhe s’i mund të shkohet te disa prova që janë të rëndësishme për hetimin. Sot kanë qenë te familja e Aleks Nikës në Lezhë”.

Lidhur me agjentin e FBI, që është arrestuar, Hoxha thotë se SPAK-u duhet të regjistrojë një procedim mbi takimet e Ramës.

Një gjykatë federale nuk mund të kryejë hetime mbi një zyrtar shqiptar nëse s’ka shkelur një ligj federal. Që ne të jemi të qartë në këtë histori, meqë kemi SPAK-un, SPAK-u duhet të regjistrojë një procedim dhe të hetojë mbi takimet e kryeministrit me këtë zyrtarin. Për të hequr mjegullën edhe ne duhet të kemi një hetim tonin. Ai këshilltari i jashtëm Dorian Duçka ka qenë njeri shumë i angazhuar gjatë kohës se Berishës dhe tani që është Rama. Duhet të thirret. Kjo çështje s’mund të mbyllet me deklarata. Çështja që e implikon zyrtarin amerikan është që është kapur duke marrë 225 mijë dollarë nga Agron Neza. Çfarë të keqe ka të thirret Rama, të vejë edhe Berisha të dëshmojë”.