Në Kirgistan nis hetimi për shkatërrimin e akullnajave

<p>Akullnajat janë masa të trasha akulli që formohen në tokë nga bora e ngjeshur përgjatë shekujve.</p> <p>Ato sigurojnë një burim jetik të ujit të ëmbël në Kirgistan, një vend pa dalje në det, ku ka mijëra të tilla. Por rritja e temperaturave për shkak të ndryshimeve klimatike dhe operacioneve minerare po i vë në rrezik.</p> <p>Akulli i akullnajave në rajonin jugor të Oshit u shkatërrua kur një kompani private "ndërtoi ilegalisht një rrugë për në një minierë qymyri" në zonë, gjoja në bashkëpunim me një firmë shtetërore, thanë prokurorët të enjten.</p> <p>“<em>Si rezultat i veprimeve të paligjshme të kompanisë private, u shkatërruan akullnajat dhe dherat në një sipërfaqe prej 9392 metrash katrorë</em>”, shtuan ata.</p> <p>Prokurorët thanë se kishin hapur një çështje penale për shkelje të sigurisë mjedisore dhe <em>"keqpërdorim të pozitës zyrtare"</em>, pa dhënë detaje.</p> <p>Duke vepruar si kulla uji, akullnajat janë burime thelbësore të ujit të ëmbël dhe luajnë një rol të rëndësishëm në sigurinë ushqimore të Kirgistanit, pasi shkrirja e akullit përdoret për ujitje dhe bujqësi.</p> <p>Shqetësimet për mungesën e ujit në Azinë Qendrore janë në rritje, me ndryshimin e klimës, infrastrukturën e amortizuar të epokës sovjetike dhe mosmarrëveshjet mbi pronësinë e ujit, të gjithë këta faktorë që e kanë rënduar problemin.</p>