Në protestën e dytë kombëtare që opozita mban përgjatë këtij viti, kreu i PD-së Sali Berisha për shkak të arrestit shtëpiak me vendim të GJKKO-së, iu drejtua mbështetësve të opozitës me një fjalim përmes ekranit.
Sali Berisha në fjalën e tij para protestuesve para kryeministrisë tha se sot gjendemi përballë një katastrofe ekzistenciale duke thënë se spastrimi etnik i butë i Shqipërisë po ndodh falë Edi Ramës
Ai e quajti Ramës, antishqiptar, që e do Shqipërinë pa shqiptarë.
Të mbledhur sot në Tiranë, nga të katër anët e vendit, nga të katër anët e dheut, diaspora dhe kudo që janë shqiptarët.
Një përshëndetje të përzemërt vëllazërore për të gjithë ju.
Të dashur miq, plot dhimbje e sakrifica të pamerituara kanë qenë për opozitën dhe Shqipërinë 11 vitet e fundit të Rilindjes së Edi Ramës.
Asnjë shqiptar përveç hajdutëve dhe trafikantëve të Rilindjes, nuk ka shpëtuar pa marrë plagë në shpirt dhe mendje nga dekada e Edi Ramës, dekada e zbrazjes së Shqipërisë.
Këto plagë do mbeten përjetë shenja mbi ata që i pësuan.
Për shumë familje, kjo plagë ka qenë një familjar që sot do ishte gjallë nëse korrupsioni i Rilindjes nuk do kishte përlarë ilaçet e tyre.
Kjo plagë do dëmtojë shëndetin e 47 përqind të fëmijëve shqiptarë që janë të kequshqyer, më keq se ata të Ruandës.
Kjo plagë do dëmtojë 15-vjeçarët që sipas PISA-s, kanë zbritur në fund të botës për mendimin e tyre krijues.
Kjo plagë ishte një pronë e grabitur, linçim politik nga puna, një fermë apo biznes i falimentuar, ku kishin investuar mundin dhe djersën e gjithë jetës së tyre.
Është ajo plagë që kanë të rinjtë, që me gjithë sakrificat e tyre, nuk mund të sigurojnë as edhe një garsionerë për të filluar jetën e tyre.
Kjo plagë është sa deti për Shqipërinë që sheh veten të boshatisur në 8 vite nga mbi 1 milion bij dhe bija të saj.
Ky dërrmim u ka vrarë shpresën, u ka shuar çdo ëndërr për Shqipërinë dhe me të drejtë, si mund të kultivohet shpresa kur nuk siguron dot ilaçet për të shpëtuar fëmijët apo prindin e sëmurë.
Kur të duhen 109 vite për të blerë në Tiranë një apartament.
Kur nuk siguron dot 3 vakte ushqimi për fëmijën tënd.
Prandaj shpëtimi i vetëm mbetet largimi masiv nga Shqipëria.
Por siç thotë populli ynë, e keqja nuk ka fund.
Shqipërisë i kanoset një kërcënim akoma më ekzistencial, sepse 83 përqind e shqiptarëve që kanë mbetur, duan të ikin.
Pra, gjendemi përballë një katastrofe ekzistenciale.
Miqtë e mi, spastrimi etnik i butë i Shqipërisë po ndodh, sepse Edi Rama vendosi në Shqipëri kushtet e llogaritshme për dëbimin e butë masiv të shqiptarëve nga vendi i tyre.
Çdo shqiptar duhet të pranojmë se vjedhjet, taksat e larta, shndërrimi i votës në krim dhe krimit në votë, shkatërrimi i institucione, kapja e drejtësisë, lufta ndaj opozitës së vërtetë, nuk kanë qene keqqeverisje. Nuk kanë qenë as rastësi, ato kanë qenë kushte të kalkuluar për nxirjen e jetës së shqiptarëve.
Rama përballë skandaleve nuk mban asnjë përgjegjësi. Nuk shfaq asnjë pendesë apo shenjë dhembshurie, sepse Edi Rama gjithçka për të e kishte pjesë të agjendës së vetë që nisi sapo mori pushtetin. Rama, ku antishqiptar e do Shqipërinë pa shqiptarë dhe nëse ka sot ndonjë shqiptar që mashtrohet nga rilindja, unë i bëj atij një ftesë, mos dëgjoni denoncimet e Sali Berishës, as ato të mediave ndërkombëtare, por ju ftoj të dëgjoni ndërgjegjen tuaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
