“Shpresa është zgjuar”, dhjetëra mijëra serbë në rrugët e Novi Sadit

<p>Studentët serbë mbajtën një tjetër protestë masive dhe bllokuan urat mbi lumin Danub në qytetin verior të Novi Sadit të shtunën. Dhjetëra mijëra u mblodhën në rrugë për të shprehur zemërimin e tyre ndaj udhëheqjes populiste të vendit dhe për të bërë thirrje për ndryshim. Protesta e së shtunës shënoi tremujorin e shembjes së çatisë së stacionit kryesor hekurudhor të Novi Sadit u shemb, duke vrarë 15 njerëz. Ishte kjo ngjarje aksidentale që gjeneroi një lëvizje të gjerë kundër korrupsionit dhe protesta të udhëhequra nga studentët.</p> <p>Shumë në Serbi besojnë se kjo ngjarje erdhi për shkak të korrupsionit të qeverisë në një projekt të madh infrastrukturor me kompani shtetërore kineze. Kundërshtarët e presidentit Vuçiç besojnë se korrupsioni u bë shkak për punën e ngadaltë gjatë rindërtimit të stacionit të trenit në Novi Sad, mbikëqyrjen e dobët dhe mosrespektimin e rregulloreve ekzistuese të sigurisë. E gjithë kjo i shërbeu shpërthimit të një pakënaqësie akoma më të gjerë për sundimin e ligjit në Serbi.</p> <p>Dhjetëra mijëra njerëz u mblodhën në Novi Sad për bllokadat që kanë marrë emrin "Tre muaj - Tre ura". Me fillimin e bllokadave, ura të tëra dhe rrugë rreth tyre u mbushën me njerëz, ndërsa shumë të tjerë qëndruan në brigjet e lumenjve poshtë tyre. Organizatorëve të protestës iu desh të caktonin njerëz që kontrollonin numrin e individëve mbi ura, në mënyrë që të shmangeshin tragjedi të tjera.</p> <p>“<em>Pas një kohe të gjatë ne mund të ndjejmë energji pozitive në ajër, në rrugë, në mesin e njerëzve</em>”, tha Slavica Nikolic, një banore.</p> <p>“<em>Kur flas me njerëzit, më duket sikur shpresa është zgjuar</em>”, tha ajo. "Ne i mbajmë mend mirë disa kohë më të shëmtuara. Kjo është më në fund një lloj shprese e re, se diçka e mirë do të ndodhë në këtë vend."</p> <p>Studentët kanë marrë një rol udhëheqës në protestat që janë shndërruar në sfidën më serioze në vite për liderin e fuqishëm populist të vendit, presidentin Aleksandar Vuçiç. Vuçiq ka akuzuar studentët dhe protestuesit e tjerë se punojnë për shërbimet e huaja të inteligjencës për ta larguar atë nga pushteti, ndërsa në të njëjtën kohë ofron lëshime dhe përpiqet të bëjë marrëveshje.</p> <p>“<em>Sot ne ofrojmë bisedime dhe dialog</em>”, tha Vuçiq të shtunën. “Në momentin që dikush mendon se do të përdorë dhunën për të marrë pushtetin, shteti do të veprojë si shtet, si kudo në botë”.</p> <p>Demonstratat e vazhdueshme detyruan dorëheqjen e kryeministrit Milos Vuçeviç në fillim të kësaj jave dhe lëshime të ndryshme nga qeveria populiste, ndërsa ajo kërkon të shuajë rezistencën në rritje.</p> <p>Mijëra njerëz dolën të premten në mbrëmje për të mirëpritur qindra studentë nga Beogradi që kishin ecur për dy ditë për t'iu bashkuar bllokadave të urave.</p> <p>Përveç Novi Sadit dhe Beogradit, protesta të përditshme dhe bllokada të trafikut janë mbajtur në të gjithë Serbinë. Shpesh ato janë shoqëruar me incidente. Një i tillë ndodhi në Beograd të premten, ku mbetën të plagosura dy gra.</p> <p>Gjatë rrugës në udhëtimin e tyre prej 80 kilometrash (50 milje) për në Novi Sad të enjten dhe të premten, studentët nga Beogradi u përshëndetën nga qytetarët me brohorima dhe bori makinash ose dolën nga shtëpitë e tyre për t’u ofruar ushqim dhe pije. Qindra të tjerë me biçikleta dhe motoçikleta u nisën veçmas drejt Novi Sadit të premten dhe të shtunën, ndërsa shoferët e taksive të Beogradit morën përsipër kthimin e marshuesve në shtëpi të dielën.</p> <p><strong>/ <a href="https://www.voanews.com/a/anti-graft-protesters-march-block-bridges-in-serbia/7959835.html">Zëri i Amerikës</a> /&nbsp;</strong></p>