Një vajzë 12-vjeçare ka mbetur e plagosur gjatë një aksidenti në ambientet e Cirkut Kombëtar, ndërsa reagimi publik ka ardhur nga Sindikata e Pavarur e Artit, Kulturës dhe Medias së Shqipërisë, e cila denoncon mungesën e sigurisë dhe heshtjen institucionale.
Sipas sindikatës, ngjarja ndodhi në prapaskenë gjatë një shfaqjeje, ku një kundrapeshë hekuri ka rënë në kokën e së miturës.
Ajo u transportua me urgjencë në spital dhe ndodhet jashtë rrezikut për jetën, por vijon trajtimin mjekësor.
Në reagim theksohet se ky nuk është një aksident i rastësishëm, por pasojë e mungesës së standardeve të sigurisë, kontrolleve teknike dhe përdorimit të ambienteve të papërshtatshme për aktivitete cirku.
Sindikata ngre shqetësimin edhe për faktin se e mitura ishte pjesë e një subjekti privat dhe jo e strukturës së institucionit.
Një tjetër element i rëndë, sipas tyre, është mungesa e reagimit nga institucionet përgjegjëse.
Deri tani nuk rezulton të jetë bërë njoftimi i Policia e Shtetit apo i Inspektoratit të Punës, çka cilësohet si shkelje e detyrimeve ligjore dhe ngre dyshime për fshehje të ngjarjes.
Sindikata i bën thirrje institucioneve për hetim të plotë të rastit dhe garantimin e kushteve të sigurisë, duke theksuar se rasti i vajzës 12-vjeçare tregon rrezikun real që vjen nga neglizhenca në vendin e punës.
Nga ana tjetër, Cirku Kombëtar ka reaguar duke sqaruar se ngjarja ka ndodhur në ambientet e Teatrit Eksperimental.
Sipas njoftimit zyrtar, më 25 prill 2026, rreth orës 11:30, gjatë shfaqjes “Përrallat në Cirk”, një pjesëmarrëse 12-vjeçare është dëmtuar gjatë një veprimi skenik akrobatik.
Cirku bën me dije se stafi ka reaguar menjëherë, duke dhënë ndihmën e parë dhe duke siguruar transportimin e vajzës në Spitalin Universitar të Traumës. Pas trajtimit, ajo është kthyer në banesë nën kujdesin e prindërve dhe ndodhet në gjendje të mirë shëndetësore.
Institucioni shpreh keqardhje për incidentin dhe thekson se është i angazhuar për zbardhjen e plotë të ngjarjes dhe përcaktimin e përgjegjësive, në bashkëpunim me autoritetet përgjegjëse.
“Çdo aludim mbi ngjarjen është i pavend, pasi Cirku Kombëtar ka kryer çdo detyrim institucional”, thuhet në reagim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
