Mijëra të evakuuar në Izmir, zjarret shkrumbojnë dhjetëra shtëpi në periferi

Me ndihmën e mjeteve nga ajri vijon beteja kundër zjarreve që përfshinë të premten rrethinat e Izmirit në Turqi.

Dhjetëra shtëpi në periferi të qytetit u dogjën dhe më shumë se 3 mijë e 500 banorë u detyruan të evakuoheshin. Deri në orët e para të mëngjesit të kësaj të shtune nuk ishte shënuar asnjë humbje në jetë njerëzish, por dhjetëra persona u shtruan në spital me probleme respiratore.

69 nga 72 vatrat e  zjarrit janë vënë nën kontroll, megjithatë flakët në rajonet periferike mbeten aktive. Në një prej zonave, zjarri u përhap edhe në një fabrikë riciklimi dhe disa objekte industriale.

Zjarret në zonat e Izmirit, Manisa dhe Bolu po luftohen me operacione nga ajri dhe toka, ndërsa gatishmëria e emergjencave civile mbetet e lartë pasi tre ditët e ardhshme konsiderohen si kritike për shkak të temperaturave. 

Sipërfaqja totale e prekur është rreth 16 mijë hektarë. Dy aeroplanë dhe njëmbëdhjetë helikopterë po vazhdojnë operacionet. Ndërhyrja në pikën ku ka nisur zjarri është e vështirë për shkak të “luginave të thepisura”, sqaroi ministri. Ministri i Bujqësisë dhe Pylltarisë, Ibrahim Yumakli, siguroi se banorët e zonave urbane nuk duhet të shqetësohen.

Sipas autoriteteve, shkak i flakëve ishte një zjarr i ndezur për një piknik nga 3 persona, ndërsa një vatër tjetër u ndez nga dy fëmijë që pinin duhan në një zonë të pyllëzuar.