Deklaratat e At Nikolla Xhufka/ Reagon Mitropolia e Shenjtë: Nuk është prift, ka improvizuar në bodrumin e shtëpisë, “kishën” e tij

At Nikolla Xhufka, predikues ortodoks në njërën nga Kishat në Elbasan, përmes një mesazhi në rrjete social ka vlerësuar shumë besimtarët mysliman në besimin dhe predikimet e tyre.

Në një komunikim me “MCN live” ai dje tha e mesazhi i tij ka trazuar pak ujërat në mesin e besimtarëve ortodoks, por si përfundim, ka reflektuar në mesin e tyre, të cilët kanë mbushur kishën në meshën e së dielës.

Lidhur me këtë, sot ka reaguar  Mitropolia e Shenjtë e Elbasanit, Shpatit dhe Librazhdit, të cilët fuqishëm demaskojnë klerikun, që sipas tyre është i rremë, dhe nuk përfaqëson asnjë kishë ortodokose në asnjë vend.

Përmes reagimit të tyre ata, thonë se i njëjti person, nuk është klerik veçse ka improvizuar në bodrumin e shtëpisë së tij, atë që ai quan “kishë”, duke e cilësuar si një “kishë paleokristiane - katakomb”.

KUSH ËSHTË NIKOLLA (BLLAZHDE) XHUFKA? Një sqarim i nevojshëm për opinionin publik.

«Ruhuni nga profetët e rremë, që vijnë të veshur si dele, por që përbrenda janë ujq grabitqarë.»
Mateu 7:15

1. Nikolla (Bllazhde) Xhufka nuk është klerik ortodoks dhe nuk njihet si i tillë nga asnjë Kishë e krishterë në asnjë vend. Pretendon se është dorëzuar nga një person serbo-rumun, i cili nuk ka asnjë lidhje me Kishen Ortodokse dhe nuk është klerik i saj. Kemi të bëjmë thjesht me një mashtrim të opinionit publik.
2. Nikolla përfaqëson vetëm veten e tij, nuk ka as kishë as komunitet besimtarësh, pavarësisht deklaratave pompoze që bën herë pas here në media.
3. Ka improvizuar në bodrumin e shtëpisë së tij, atë që e quan “kishë”, duke mashtruar haptazi edhe në media se bëhet fjalë për një “kishë paleokristiane - katakomb”.
4. Mashtron dhe gënjen haptazi dhe në media se ka kryer studime fetare ndërkohë që ska bërë anjë të tillë. Sa për saktësi, ka mbaruar shkollën e mesme profesionale për teknologji - ushqimore në Elbasan, madje përsëritës i vitit të fundit.
5. Bën deklarata “patriotike”, ndërkohë përbuz dhe tallet me klerikët ortodoksë shqiptarë, gjithashtu vë në lojë dhe ironizon seriozitetin e liderëve fetarë dhe të klerikëve të besimeve të tjera.
6. Mungesa e formimit fetar bën që deklaratat e tij mediatike në lidhje me besimin ortodoks të jenë të gabuara dhe disinformuese. Ky person nuk varet nga asnjë autoritet kishtar dhe nuk mban përgjegjësi për veprimet e tij.
7. I vetmi interes i tij është shfaqja mediatike dhe tërheqja e opinionit publik, pavarësisht dëmit që i shkakton figurës së klerikut dhe besimit ortodoks.
8. Deklaratat e tij të papërgjegjëshme në media, nën maskën e petkut fetar, shkaktojnë pakënaqësi, duke nxitur rivalitet mes besimeve fetare, mungesë respekti reciprok dhe për pasojë urrejtje ndërfetare.
9. E shohim me shqetësim mediatizimin e tij. Marrja e informacionit paraprak nga mediat për personin në fjalë, i cili nuk i përket asnjë komuniteti fetar, nuk ka asnjë autorizim, nuk ka formim përkatës dhe nuk përfaqëson askënd përveç vetes së tij, do e bënte të qartë përse nuk meriton të merret seriozisht.
10. Kisha Orthodhokse Autoqefale e Shqipërisë është i vetmi autoritet shpirtëror dhe zyrtar që garanton ruajtjen dhe promovimin e parimeve dogmatike dhe kishtare, e cila udhëhiqet nga organet e saj legjizime në përputhje me statutin dhe kanonet kishtare. Çdo përpjekje, si në të shkuarën ashtu edhe tani, për të nënvlerësuar rolin dhe kontributin e Kishës Orthodhokse në Shqipëri do të dështojë me hirin dhe ndihmën e Zotit.
Mitropolia e Shenjtë e Elbasanit, Shpatit dhe Librazhdit.

Elbasan më, 16 nëntor 2022