Ligji që detyron KLGJ-në të hapë garën për kryetarët e gjykatave (VIDEO)

Teksa gjykatat drejtohen me zëvendëskryetar në të gjithë vendin, ligji për organizimin e pushtetit gjyqësor ka përcaktuar qartë jo vetëm mënyrën e përzgjedhjes së drejtuesit, por po ashtu edhe kompetencat e tij nga përfaqësimi me të tjerët, kontaktet me institucionet kontrolluese e deri tek lista e shorteve.

E teksa me vendim të vitit 2018, Këshilli i Lartë Gjyqësor ka vendosur të zgjedhë zëvendëskryetarin me votat e trupës gjykuese, ligji 98/2016 për organizimin e pushtetit gjyqësor në Republikën e Shqipërisë detyron qeverisjen e gjyqësorit të hap garën për kryetar.

Sipas nenit 26 të këtij ligjit përzgjedhja bëhet “Kryetari i një gjykate zgjidhet sipas kritereve dhe procedurave të përcaktuara në ligjin “Për statusin e gjyqtarëve dhe prokurorëve në Republikën e Shqipërisë” dhe ka kompetencat e përcaktuara sipas këtij ligji”.

Por cilat janë kompetencat e një drejtuesi gjykate, kryetari të zgjedhur me mandat?

Në neni 36 të ligjit për organizimin e pushtetit gjyqësor, ligj i paketës së reformës në drejtësi kryetari i gjykatës ka përgjegjësi për menaxhimin e përgjithshëm gjyqësor dhe ushtron këto detyra:

a) përfaqëson gjykatën në marrëdhënie me të tretët

b) në fillim të çdo viti miraton një listë, e cila përditësohet kur është e nevojshme, që përcakton gjyqtarët për gjykimet e rasteve urgjente, siç përcaktohet me ligj, sipas rendit alfabetik me bazë mbiemrin, në përputhje me rregullat e miratuara nga Këshilli i Lartë Gjyqësor;

c) mban kontakt me grupet e kontrollit të institucioneve të tjera shtetërore, njihet me qëllimin dhe objektin e kontrollit dhe u krijon atyre mundësi për ushtrimin e detyrës;

ç) mbikëqyr respektimin e etikës gjyqësore dhe të solemnitetit, si dhe bashkëpunon me KLGJ në lidhje me vlerësimin etik dhe profesional të gjyqtarëve;

d) mbikëqyr disiplinën në punë të gjyqtarëve dhe kërkon fillimin e hetimit kur dyshohet shkelje disiplinore e gjyqtarëve në gjykatat e tyre;

dh) kujdeset për organizimin dhe funksionimin e administrimit gjyqësor në gjykatë në lidhje me veprimtaritë jogjyqësore nëpërmjet kancelarit, përveç rasteve kur parashikohet ndryshe në këtë ligj;

e) thërret, përgatit dhe drejton mbledhjet e përgjithshme të gjyqtarëve dhe të Këshillit të Gjykatës, përveçse kur parashikohet ndryshe në këtë ligj;

ë) udhëzon dhe mbikëqyr kancelarin;

f) verifikon ankesat, heton shkeljet disiplinore dhe propozon fillimin e procedimit disiplinor ndaj kancelarit;

g) kryen veprimet dhe merr vendime që lidhen me statusin e nëpunësve civilë gjyqësorë, siç parashikohet në këtë ligj;

gj) garanton zbatimin e vendimeve të Këshillit të Lartë Gjyqësor, në veçanti në lidhje me masat që kanë për qëllim rritjen e efikasitetit dhe cilësisë së shërbimeve gjyqësore;

h) garanton qasjen dhe mënyrën e përdorimit të sistemit të menaxhimit të çështjeve, në përputhje me politikat e përgjithshme shtetërore në fushën e teknologjisë dhe sigurisë së informacionit dhe rregullave të miratuara nga Këshilli i Lartë Gjyqësor, sipas parashikimeve të ligjit “Për organet e qeverisjes së sistemit të drejtësisë”;

i) ushtron çdo detyrë tjetër që lidhet me veprimtaritë jo gjyqësore të gjykatës, siç përcaktohet me ligj ose vendim të Këshillit të Lartë Gjyqësor.