Shqipëria dhe Kosova do të kenë ministri të veçanta për marrëdhëniet me njëra-tjetrën.
Ideja e hedhur disa ditë më parë nga kryeministri Edi Rama duket se ka gjetur mbështetje te Vetëvendosja, e cila doli parti e parë nga zgjedhjet e 6 tetorit. Rama është shprehur se do t’ia propozojë këtë kryeministrit të pritshëm të Kosovës, Albin Kurti.
Ky propozim pritet të mbështetet nga Vetëvendosje. Këtë e ka lënë të kuptohet anëtarja e kryesisë së Lëvizjes Vetëvendosje, Albulena Haxhiu, e cila gjatë një interviste në Kosovapress, tha se zyrtarisht partia nuk e ka pranuar këtë propozim, por ai është i mirëpritur.
Haxhiu tha se fuqizimi i raporteve në mes Kosovës dhe Shqipërisë do jenë prioritet i qeverisë Kurti.
Haxhiu ka theksuar se, qeveria e udhëhequr nga Albin Kurti do të fokusohet në zbatimin dhe jetësimin e marrëveshjeve të nënshkruara në mes Kosovës dhe Shqipërisë. Një premtim ky i bërë edhe nga vetë Albin Kurti në një nga intervistat e para pas fitores së zgjedhjeve.
Rama dhe Albin Kurti pritet të takohen mbrëmjen e sotme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
