Për të marrë shërbime dhe për tu identifikuar në zyrat elektronike të shtetit, shqiptarët do të duhet të pajisen me ID letërnjoftimin digjital. Është kjo nisma e qeverisë shqiptare e cila ka mbërritur në parlament, ndërsa pritet të hap debat për sigurinë e të dhënave pas sulmeve kibernetike.
Shqiptarët brenda dhe jashtë kufijve, përveç kartës fizike të identitetit, do të mund të pajisen edhe me letërnjoftim digjital.
Emisioni “FactChecK” ka siguruar draft ligjin e propozuar nga ministri i Brendshëm z.Taulant Balla i cili i hap rrugë krijimit të identitetit digjital të shqiptarëve.
Sipas relacionit shoqërues, qëllimi i projektligjit është përmirësimi i mënyrave të identifikimit të qytetarëve. Ky projektligj është në përputhje me ligjet e Bashkimit Europian, që në vitin 2024 zbatoi një rregullore të re për identitetin digjital.
Me këtë projektligj, Shqipëria synon të përafrojë kuadrin ligjor me BE-në, në një kohë që vendi ka hapur negociatat dhe po njehson ligjet.
Por çfarë thotë ligji që i hap rrugë krijimit të identitetit digjital të shqiptarëve?
Në nenin një të ligjit thuhet: pas fjalës “elektronik” shtohet togfjalëshi “dhe digjital”.
Ndërsa në neni tre të tij ligji parashikon se: “Letërnjoftimi mund të jetë në formë elektronike ose digjitale. Në çdo rast, shtetasit mund të zgjedhin për t’u pajisur me një nga format e letërnjoftimit, ose mund të pajisen njëkohësisht me letërnjoftimin në të dy format, elektronike dhe digjitale.”
Te teksa qeveria aktuale e mazhorancës së majtë pas më shumë se një dekade largoi koncesionarin e pasaportave duke krijuar kompaninë shtetërore Identitek, prodhimi i ID digjitale pritet ti hap rrugë sërish bashkëpunimit me kompani privare.
Në nenin 6/1 të këtij ligji thuhet: Letërnjoftimi digjital mund të prodhohet nga shoqëria aksionare përgjegjëse për prodhimin dhe shpërndarjen e dokumenteve biometrikë vetë ose në bashkëpunim me shoqëri të tjera që kanë eksperiencën dhe kapacitetet teknike dhe financiare për prodhimin e letërnjoftimev digjitale.
2. Rregullat dhe procedurat për përzgjedhjen e shoqërive që mund të bashkëpunojnë me shoqërinë aksionare përgjegjëse për prodhimin dhe shpërndarjen e dokumenteve biometrik për prodhimin e letërnjoftimeve digjitale përcaktohen me vendim të Këshillit të Ministrave.
Projektligj është propozim i Ministrisë së Brendshme dhe Identitek. Sa i përket shpenzimeve të projektligjit, në relacionin shoqërues thuhet se efektet financiare do të parashikohen në vendimin e Këshillit të Ministrave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
