Deputeti socialist Erion Braçe dhe kreu i Partisë “Mundësia”, Agron Shehaj, janë përfshirë në një debat të ashpër gjatë seancës plenare në Kuvend.
Debati nisi nga foltorja, ku Braçe iu drejtua Shehajt duke e akuzuar se i përket “parelinjve” që, sipas tij, kërkojnë të vendosin diktatin e parasë në vend.
“Je i njëjti soj, i llojit të parelinjve në këtë vend që duan të vendosin edhe më fort diktatin e parasë, ky je ti”, u shpreh Braçe.
Edhe pasi u ul në vendin e tij, tensionet mes tyre nuk u shuan.
Shehaj iu përgjigj nga vendi duke i thënë Braçes: “Je llum brenda llumit, ky je ti. Hajdut i vogël”.
Kjo solli reagimin e menjëhershëm të Braçes, i cili u ngrit nga vendi dhe iu drejtua Shehajt me tone të ashpra, duke i kujtuar edhe deklarata të mëparshme mes tyre.
Në debat u përfshi edhe kreu i Grupit Parlamentar të Partisë Socialiste, Taulant Balla, i cili nga foltorja hodhi akuza ndaj Shehajt, duke e cilësuar “gjobaxhi” dhe duke i përmendur pretendime lidhur me një biznesmen dhe të dhënat e partisë së tij.
Situata u tensionua më tej, duke detyruar ndërhyrjen e deputetëve të tjerë për të qetësuar atmosferën. Më pas, kryetari i Kuvendit Niko Peleshi ndërpreu seancën për 5 minuta.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
