Ministria e Brendshme ka shpallur “non grata” dy shtetas të Maqedonisë së Veriut, për të cilët autoritetet shqiptare deklarojnë se disponojnë të dhëna që i lidhin me veprimtari që cenojnë interesat dhe sigurinë kombëtare të Republikës së Shqipërisë.
Bëhet fjalë për Valon Belën, i njohur edhe si Valjon Bela, dhe Bekir Halimin, të dy shtetas të Maqedonisë së Veriut.
Mesohet se vendimi është marrë në kuadër të masave të ndërmarra për mbrojtjen e sigurisë kombëtare.
Në mbledhjen dhe verifikimin e informacionit mbi aktivitetin e tyre është angazhuar edhe Njësia Antiterror pranë Policisë së Shtetit.
Valon Bela është një politikan nga Maqedonia e Veriut, i njohur për angazhimin e tij në Lëvizjen Besa, ndërsa Bekir Halimi është hoxhë dhe teolog.
Shpallja “non grata” nënkupton ndalimin e hyrjes dhe qëndrimit të këtyre shtetasve në territorin e Republikës së Shqipërisë.
Autoritetet shqiptare nuk kanë bërë publike detaje mbi arsyet konkrete që çuan në marrjen e kësaj mase, duke argumentuar vendimin me nevojën për mbrojtjen e sigurisë kombëtare.
Disa javë më parë, autoritetet shqiptare shpallën “non grata” edhe shtetasen nga Kosova, Ikballe Berisha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
