Basha: Maxhoranca, plan kriminal për të kapur të gjitha institucionet

Partia Demokratike akuzon maxhorancën se ka një plan kriminal për kapjen e çdo institucioni. Kreu i PD-së, Lulzim Basha, tha në një dalje për mediat se rasti i Gkykatës Kushtetuese tregon qartë që maxhoranca dhe kryeministri Rama nuk e duan drejtësinë e pavarur. Basha tha se për maxhorancën qeverisëse, kapja e institucioneve dhe shkelja hapur e ligjeve është kthyer në normë. Për kreun e demokratëve, Parlamenti ka vetëm 82 deputetë të ligjshëm, që megjithatë, kalojnë ligje që grabisin pronat dhe xhepat e qytetarëve. "Shkelja e vazhdueshme e Kushtetutës, kapja e çdo institucioni tani nuk është më përjashtimi por rregulli. Kuraja me të cilën kjo maxhorancë dhe ky kryeministër u përpoqën të shkelnin dhe të dhunonin Kushtetutën, të uzurponin kompetencat e një institucioni tjetër siç është ai i Presidentit të Republikës, në mënyrë që të kapnin një anëtar të Gjykatës Kushtetuese që me Kushtetutë nuk i takonte të emërohej as nga Edi Rama, as nga Ardian Dvorani por nga Presidenti i Republikës dhe lehtësia me të cilën u munduan ta kalojnë këtë tregon dimensionin e vërtetë kriminal të këtij plani për kapjen e çdo institucioni dhe është mbi të gjitha tregutreguesi i paligjshmërisë totale ku noton vendi", tha Basha.