Një tjetër shenjë e fortë e krizës klimatike, shi në majën e akullt të Groenlandës

Një tjetër shenjë e fortë e krizës klimatike është shiu i rënë në majën e akullt të Groenlandës.

Shkencëtarët në stacionin samitor të Fondacionit Kombëtar të Shkencës të SHBA panë që shiu ra gjatë 14 gushtit, por nuk kishin matës sepse reshjet ishin të papritura. Në të gjithë Groenlandën, rreth 7 miliardë tonë ujë u lëshuan nga retë.

Shiu ra gjatë tre ditëve jashtëzakonisht të nxehta në Groenlandë kur temperaturat ishin 18 gradë më të larta se mesatarja. Si rezultat, shkrirje u pa në pjesën më të madhe të Groenlandës, në një zonë rreth katër herë më të madhe se madhësia e Mbretërisë së Bashkuar.

Raporti i fundit nga Paneli Ndërqeveritar për Ndryshimet Klimatike arriti në përfundimin se ishte "e qartë" se emetimet e karbonit nga aktivitetet njerëzore po ngrohin planetin dhe shkaktojnë ndikime të tilla si shkrirja e akullit dhe ngritja e nivelit të detit.

Në maj, studiuesit raportuan se një pjesë e rëndësishme e shtresës së akullit të Groenlandës po i afrohej një pike kthese, pas së cilës shkrirja e përshpejtuar do të bëhej e pashmangshme edhe nëse ngrohja globale do të ndalet.

Groenlanda gjithashtu pati një episod shkrirjeje në shkallë të gjerë në korrik, duke e bërë 2021-shin një nga vetëm katër vitet e shekullit të kaluar që ka parë një shkrirje kaq të përhapur. Vitet e tjera ishin 2019, 2012 dhe 1995

Niveli i detit është rritur tashmë me 20 cm dhe IPCC tha se diapazoni i mundshëm deri në fund të shekullit ishte 28-100 cm të tjera.

Akulli i Groenlandës po shkrihet më shpejt se çdo herë tjetër në 12,000 vitet e fundit sipas shkencëtarëve.