“Agresioni rus kundër Ukrainës dhe zgjerimi evropian”/ Nis sot Forumi Strategjik i Bled-it, Rama pjesëmarrës në punime

Sot më 29 gusht në Slloveni do të mbahet edicioni i 17-të i Forumit Strategjik të Bled-it (BSF).

Konferenca ndërkombëtare, kryesore në Evropën Qendrore dhe Juglindore, do të fokusohet në krizën e rendit shumëpalësh dhe përgjigjen e komunitetit ndërkombëtar ndaj sfidave në zhvillim.

Agresioni rus kundër Ukrainës dhe zgjerimi evropian në këtë kohë krize janë dy temat kryesore mbi të cilat do të ndërtohet diskutimi.

E pikërisht për këtë të fundit, fjalën do ta mbajë edhe kryeministri i Shqipërisë, Edi Rama.

Lideri i Qeverisë shqiptare do të jetë në një panel me kryeministrin e Sllovenisë, Robert Golob, presidentin e Islandës, Guðni Th. Jóhannesson, kryeministrin e Kroacisë, Andrej Plenkoviç dhe presidenten e Moldavisë, Maia Sandu.

Por përpara diskutimit të liderëve një hapësirë adresimi nëpërmjet një videoje do ta ketë presidenti i Ukrainës, Volodymyr Zelensky.

Më pas debati, që pritet të parashtrohet për panelistët dhe pjesëmarrësit, do të jetë ai i dinamikave të reja mbi të ardhmen e Evropës.

Në ditën e dytë të Forumit diskutimet do të përqendrohen në situatën e fqinjësisë evropiane, ndihmën dhe rindërtimin e Ukrainës, pasojat e agresionit rus në sigurinë ushqimore dhe energjitike në Evropë.

Forumi Strategjik i Bled-it është një platformë jozyrtare, ku pjesëmarrësit e nivelit të lartë diskutojnë mbi sfidat politike, të sigurisë dhe të zhvillimit me të cilat përballet Evropa.