Një libanez i sanksionuar nga Shtetet e Bashkuara të Amerikës për lidhjet e tij të dyshuara me grupin palestinez Hamas u gjet i vdekur të mërkurën pasi rezultonte i zhdukur për një javë, thanë media shtetërore libaneze dhe zyrtarë gjyqësorë.
Mohammad Srour, 57 vjeç, u sanksionua nga Thesari Amerikan i Shtetit në gusht 2019 për dhënien e “mbështetjes financiare, materiale, teknologjike, financiare apo shërbime të tjera” për Hamasin dhe lidhjen e tij me Hezbollahun.
Ai u akuzua për transferimin e dhjetëra miliona dollarëve çdo vit nga Korpusi i Gardës Revolucionare Islamike të Iranit në krahun ushtarak të Hamasit, Brigadat Qassam.
Zyrtarët gjyqësorë libanezë thonë se ai ka punuar për krahun financiar të Hezbollahut.
Vdekja e Srour vjen disa ditë pasi një zyrtar lokal i partisë politike nacionaliste të krishterë libaneze u gjet i vrarë në një qytet kufitar sirian pranë kufirit verilindor të Libanit. Autoritetet thonë se ai u rrëmbye nga një bandë siriane në veri të Libanit.
Ndërkohë rrethanat e vdekjes së Srour janë të paqarta.
Agjencia Kombëtare e Lajmeve e Libanit, duke iu referuar Srour vetëm me inicialet e tij, tha se ai u zhduk për disa ditë pasi shkoi në një dyqan transferimi parash për të tërhequr një pagesë që i ishte dërguar. Trupi i tij u gjet me tre plagë plumbash.
Dy zyrtarë gjyqësorë i thanë Associated Press se Srour ishte joshur në shtëpinë e një gruaje në lindje të Bejrutit në Beit Mery, ku u qëllua gjashtë herë.
Zyrtarët, të cilët folën në kushte anonimati në përputhje me rregulloren, thanë se hetimi është në vijim.
Zyrtarët e inteligjencës dyshojnë se disa persona mund të jenë të përfshirë në vrasje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
