Turqia dhe Greqia, sërish në tryezën e bisedimeve

Turqia dhe Greqia kanë nisur sot ato që njihen si bisedime eksploratore. Takimi i parë ka nisur sot në një hotel në qendër të Athinës, sipas burimeve diplomatike, të cilave u referohet Kathimerini.

Delegacioni grek përbëhet nga diplomatët me përvojë ambasadori Pavlos Apostolidis dhe ambasadori Alexandros Kougiou, si dhe Ifigenia Kanara, drejtori i zyrës së sekretarit të përgjithshëm të Ministrisë së Jashtme.

Pala turke përbëhet nga zëvendësministri i Punëve të Jashtme, Sedat Onal, drejtori i Përgjithshëm për Çështjet Bilaterale Politike dhe Detare-Aviacion-Kufiri, Cagatay Erciyes, dhe zëvendësdrejtori i Përgjithshëm i Kufirit të Aviacionit Detar, Baris Kalkavan.

Ibrahim Kalin, këshilltari kryesor i Presidentit turk Rexhep Tajip Erdogan, nuk pritet të ishte pjesë e takimit të së martës.

Ndërkohë, Onal do të takohet të mërkurën me sekretarin e Përgjithshëm të Ministrisë së Jashtme Greke, Themistoklis Demiris.

Turqia gjithashtu po kërkon të planifikojë një takim midis ministrit të saj të jashtëm Mevlut Çavusoglu me homologun e tij grek, Nikos Dendias.

Në fund të janarit, Greqia dhe Turqia nisën bisedimet e para të drejtpërdrejta në gati pesë vjet mbi kontestin e ashpër të Mesdheut Lindor.