Viktima e nëntë e të ftohtit, 61-vjeçari gjendet i pajetë në banesë

I ftohti që ka përfshirë vendin ditët e fundit ka regjistruar viktimën e radhës. Mëngjesin e sotëm, rreth orës 09:02, është gjetur një person i pajetë në hyrje të banesës së tij në Sarandë.

Policia ka shkuar menjëherë në vendngjarje dhe ka konstatuar se në lagjen nr.4, në hyrje të banesës së tij private është gjetur i pajetë, shtetasi Zh.T, rreth 61 vjeç.

Nga veprimet e para hetimore, në trupin e viktimës nuk vërehen shenja dhune apo dëmtime të tjera. Sipas policisë dyshohet se ky shtetas ka ndërruar jetë nga i ftohti.

Grupi hetimor ndodhet në vendngjarje dhe po punon për sqarimin e rrethanave të vdekjes.61-vjeçari bëhet viktima e nëntë në Shqipëri që prej uljes drastike të temperaturave në ditët e para të këtij viti.