Anëtari i FRPD Irakli Pina tha në edicionin e lajmeve në Mcn Tv se PD-së i mungon analiza pas zgjedhjeve.
Duke folur në edicionin e lajmeve në Mcn Tv ai vuri në dukje se kemi nevojë për një brez të ri politikanësh, duke u shprehur kundër faktit që nënkryetari dhe kreu i grupit parlamentar janë graduar pa u votëbesuar, dhe pa pëlqyeshmëri në elektorat.
Pina tha se duhet një kartë morale dhe sinqeritet me qytetarët për të shkuar te shtresa gri, që është një hambar votash.
“Unë në protestat e opozitës jam bashkuar që në 2015-ën. S’kam munguar në asnjë moment sepse unë jam anëtar i PD. Kam parë që në PD gjatë zgjedhjeve lokale dhe të përgjithshme, PD s’ka arritur të ngrihet në lartësinë e vet pas zgjedhje. Ne kemi harruar të ulemi me njëri-tjetrin dhe t’i diskutojmë ato probleme në rrethin tonë. Duke parë mungesën e takimeve brenda strukturave, unë zgjodha një metodë origjinale, që ne do shkojmë në shesh dhe do t’i diskutojmë. Kemi nevojë për një brez të ri politikanësh pasi në 4 mandate kemi ricikluar humbës kronikë në PD.
Dje vendosa ta shpreh mendimin tim ashtu siç e gjykoj dhe e shoh. Nuk është se jam kundër Berishës dhe po mbështes një tezë, ku po mundohem të përfitoj politikisht. Dua të reformohemi si forcë politike dhe të shkojmë drejt fitores. Gabimet e PD-së vijojnë që pas Rithemelimit. Bashkimi në diversitet. Në PD s’u bë një analizë nëse duhej ky Bashkim në diversitet në atë lloj forme. Njerëzit që u amnistuan dhe morën postet që kishin, në bazë s’janë të pëlqyer, sepse neve na u drejtuan duke na thënë kriminelë të Saliut, dhe tub oksigjeni i Ramës dhe s’pati një ndjesë publike.
Nuk ndërruam drejtuesit politikë atje ku ishin për t’u ndërruar drejtuesit politikë. Gabuam në primare, ku lamë më të votuarit e primareve jashtë. Pas zgjedhjeve u fikëm si forcë politike, s’patëm takim me njëri-tjetrin, s’patëm proces analize. Thamë që zgjedhjet janë farsë dhe s’u ulëm që të themi ku na qëndrojnë këto probleme me këto zgjedhje. Dr. Berisha ka punuar me marshin e 5-të në fushatë dhe njerëzit pas tij fikeshin me marshin e parë.
Njerëz që s’u votëbesuan u graduan në pozicionin që ishin më parë. Dikush u bë kreu i grupit parlamentar dhe dikush tjetër nënkryetar partie. Nuk e di pse duhet të gradoheshin këta dhe jo individë të listave të hapura. Po të përmend dy emra Gjin Gjoni, Jorida Tabaku”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
