Nikolla Gruevski ka dhënë dorëheqje nga detyra si kryetar i partisë VMRO DPMNE, e cila ka qeverisur Maqedoninë deri para qershorit të këtij viti, kur drejtimin e vendit e mori Lidhja Social Demokrate e kryeministrit aktual, Zoran Zaev.
Në letrën drejtuar kryesisë së partisë, Gruevski e motivon dorëheqjen me rezultatet e dobëta të VMRO DPMNE-së në zgjedhje.
Pas largimit të Gruevskit, i cili e ka mbajtur për 14 vjet drejtimin e partisë, pritet që pasuesi i tij të zgjidhet brenda dhjetorit.
”Komiteti Qendror i VMRO DPMNE-së, vendosi që kongresi partiak të mbahet më 22 dhe 23 dhjetor, në Vallandovë ku do të marrin pjesë 544 delegatë, lista e të cilëve do të publikohet në ueb faqen zyrtare të partisë”, ka thënë para mediave Hristijan Mickovski, sekretari i Përgjithshëm i partisë.
Ndër kandidaturat e mundshme janë deputetët Ilija Dimovski dhe Antonio Mislloshoski, ish-ministri i Punëve të Jashtme, Nikolla Poposki, ish-ministri i Shëndetësisë, Nikolla Dimitrov, Hristijan Mickovski, por edhe emri i ish-kryetarit të partisë, Lubço Georgievski.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
