Ish-kreu i Forcave të Armatosura aktualisht deputet i Partisë Socialiste, Bardhyl Kollçaku thotë se qeveria shqiptare po shqyrton mundësinë e rikthimit të shërbimit të detyruar ushtarak.
Ministria e Mbrojtjes është duke studiuar rikthimin e shërbimit të detyrueshëm ushtarak. Janë një pjesë e vendeve të NATO-s që e kanë rikthyer me një kohë të reduktuar, pasi është e rëndësishme në kuadrin e masave të qëndrueshmërisë që gjeneratat e sotme, duhet të kenë njohuri bazë, 2-3 javore, për shërbimin ushtarak, njohjen e armatimin, njohjen e disiplinave. Bën mirë për forcimin e disiplinës dhe karakterit kombëtar për brezin që po rritet.
Në një intervistë për MCN TV Kollçaku komentoi vendimin e NATO-s për rritjen në 5% të buxhetit për mbrojtjen, ku në 10 vitet e ardhshme Shqipëria do të duhet të rris ndjeshëm buxhetin e saj për mbrojtjen.
Dhjetë vitet e ardhshme deri në vitin 2035 do të vlerësohet në mënyrë në mënyrë proporcionale rritëse 5% e PBB, 3.5% do të jenë shpenzime që lidhen direkt me fushën e mbrojtjes, pajisjen, armatimin, infrastrukturën, ndihma për Ukrainën etj.
Ndërsa 1.5% është investim i e natyrës civile-ushtarake, me natyrë dyfishe, këtu kam parasysh portet, aeroportet, rrugët, urat, mbrojtjen kibernetike dhe shumë aspekte të tjera që do i shërbejnë shoqërisë dhe në rast krize dhe agresioni do i shërbejnë edhe mbrojtjes.
Ai shtoi se implementimi i angazhimit për buxhetin do jetë duke u rritur çdo vit dhe në vitin 2029 do të ketë një rivlerësim se sa janë arritur objektivat dhe nëse buxheti do të rivlerësohet për të shtuar investimet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
