Inceneratori i Tiranës, Apeli i GJKKO ul dënimin për Alqi Bllakon

Gjykata e Posaçme kundër Korrupsionit dhe Krimit të Organizuar ka vendosur të ulë dënimin ndaj Alqi Bllakos, në çështjen që lidhet me inceneratorin e Tiranës. 

Apeli shpalli të pafajshëm ish-sekretarin e Ministrisë së Mjesisit për njërin prej episodeve të korrupsionit të ngritura ndaj tij.

Bëhet fjalë për episodin që lidhej me përfitimin e 7 milionë lekëve në formë page, akuzë për të cilën Apeli vendosi pafajësinë e Bllakos. 

Ndërkohë, gjykata la në fuqi episodin tjetër të korrupsionit, që ka të bëjë me shumën prej 119 mijë eurosh, të cilat sipas dosjes Bllako i ka përfituar nga pronarët e inceneratorëve, Klodian Zoto dhe Mirel Mërtiri.

Me këtë vendim, Apeli i Posaçëm uli dënimin nga 4 vite burg në 3 vite. Në aplikim të gjykimit të shkurtuar, dënimi përfundimtar që do të vuajë Bllako reduktohet në 2 vite burg.

Ish-sekretari i përgjithshëm i Ministrisë së Mjedisit ka kryer tashmë pjesën më të madhe të dënimit në qeli, ndërsa periudhën e mbetur do ta shlyejë nëpërmjet shërbimit të provës.

Vendimi

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Igerta Hysi (kryesuese), Engert Pëllumbi (anëtar) dhe Daniela Shirka (anëtare), sot më 20.05.2026, shpalli vendimin mbi çështjen penale nr. 30 akti, datë 11.03.2026 regjistrimi, mbi ankimin e Prokurorisë së Posaçme kundër Korrupsionit dhe Krimit të Organizuar, ndaj vendimit nr. 69, datë 04.11.2025, të Gjykatës së Posaçme të Shkallës së Parë për Korrupsionin dhe Krimin e Organizuar.

Në përfundim, Gjykata e Posaçme e Apelit për Korrupsionin dhe Krimin e Organizuar vendosi:

1. Lënien në fuqi të vendimit nr. 69, datë 04.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar për sa ka disponuar lidhur me fajësinë, cilësimin juridik dhe masën e dënimit të dhënë për faktin penal të përfitimit të parregullt të shumës 119,715 (njëqind e nëntëmbëdhjetë mijë e shtatëqind e pesëmbëdhjetë) euro, si dhe për disponimet lidhur me aplikimin e dënimit plotësues dhe shpenzimet gjyqësore.

2. Ndryshimin e vendimit nr. 69, datë 04.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar për pjesën tjetër, si më poshtë:

-Deklarimin e pafajshëm të të pandehurit A.B, për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259 i Kodit Penal, sipas kësaj dispozite para ndryshimeve me ligjin nr. 43/2021, për faktin penal lidhur me përfitimin e parregullt për shtetasin V.B në vlerën 7.520.000 (shtatë milion e pesëqind e njëzet mijë) lekë, për shkak se fakti nuk përbën vepër penale.

-Në zbatim të nenit 406/1 të Kodit të Procedurës Penale, të pandehurit A.B i ulet 1/3 (një e treta) e dënimit të dhënë për faktin penal të përfitimit të parregullt të shumës 119,715 (njëqind e nëntëmbëdhjetë mijë e shtatëqind e pesëmbëdhjetë) euro, duke u dënuar përfundimisht me 2 (dy) vjet burgim.

-Në bazë dhe për zbatim të nenit 59 të Kodit Penal, urdhërohet pezullimi i ekzekutimit të vendimit me burgim dhe vënia në provë e të pandehurit A.B., për një periudhë kohe të barabartë me dyfishin e pjesës së mbetur të pavuajtur të dënimit me burgim.

-Detyrimin e të pandehurit A.B., të mbajë kontakte të rregullta me Zyrën Vendore të Shërbimit të Provës Tiranë.

-Detyrimin e të pandehurit A.B., të mos shoqërohet me persona të dënuar.

-Ngarkohet Prokuroria e Posaçme Kundër Korrupsionit dhe Krimit të Organizuar për ekzekutimin e këtij vendimi.

3. Ndryshimin e vendimit nr. 682, datë 28.11.2024 të Gjykatës së Posaçme të Shkallës së Parë për Korrupsionin dhe Krimin e Organizuar vetëm për sa i përket disponimit për caktimin e  gjobës në masën 10.000 (dhjetë mijë) lekë për kërkuesin Prokuroria e Posaçme kundër Korrupsionit dhe Krimit të Organziuar, duke e hequr masën e gjobës.

4. Shpenzimet e gjykimit në apel i ngarkohen të pandehurit.

5. Kundër këtij vendimi lejohet rekurs në Gjykatën e Lartë, brenda 45 (dyzet e pesë) ditëve, duke filluar ky afat nga e nesërmja e njoftimit të vendimit.