Operacion anti-drogë në Lezhë, asgjësohen 2 parcela me 600 rrënjë kanabis

600 bimë kanabis janë zbuluar në në fshatin Kaluer, Lezhë dhe fshatin Gërnac, Kurbin si rezultat i fazës së dhjetë të megaoperacionit “imazhi”.

Burimet zyrtare bëjnë me dije se falë kontrollit të zonës me dronë nga ajri si dhe kontrollit në terren në fshatin Kaluer, Lezhë, u gjetën të kultivuara në tokë të ndara në parcela 300 bimë narkotike cannabis sativa si edhe në fshatin Gërnac, Kurbin, u gjetën të kultivuara në tokë në zonë të pyllëzuar, 300 bimë të tjera narkotikë cannabis sativa, të cilët u asgjësuan me anë të djegies.

Policia e Lezhës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Lezhë, vijon veprimet hetimore, me qëllim identifikimin dhe arrestimin e autorit/ëve të kësaj veprimtarie kriminale.

Ndërkohë më herët, gjatë 9 fazave të këtij megaoperacioni, në fshatra të ndryshëm të qarkut, u asgjësuan me anë të djegies në total 14.779 bimë narkotikë dhe u vunë në pranga 3 shtetas si dhe u shpall 1 tjetër në kërkim, autorë të dyshuar të kësaj veprimtarie kriminale.