Vendimi për Beketin, si ra premtimi i qeverisë për të mos paguar gjobën 120 mln euro? (VIDEO)

Vendimi i arbitrazhit që e gjobiti Shqipërinë me 120 milionë euro për çështjen Becchetti erdhi në momentin më të papërshtatshëm për Edi Ramën, në kulmin e fushatës elektorale. Madje, skandali u thellua më tej kur MCN publikoi një investigim i cili përfshinte drejtpërdrejtë zyrtarët më të lartë të qeverisë në këtë çështje. I vënë në vështirësi, Edi Rama e gjeti rrugën e shpëtimit. Ai u premtoi publikisht shqiptarëve se gjoba nuk do të paguhej asnjëherë.

Ato 110 milionë nuk ka për t'i marrë kurrë. Ju them shqiptarëve, që kjo nuk ka mbaruar. Se si, nuk e them dot tani. Mbajeni këtu, ai do të paguajë një për një, dëmet që u ka sjellë shqiptarëve. Jam nga ata që kur them çfarë nuk do të lejojë të ndodhë, nuk e luan topi.

Rakipi: Si do ta bësh këtë?

Rama: Nuk e them dot këtu.

Rakipi: Ta kuptoj sikletin. Është shumë i madh sikleti. Nuk mbaje dot Becchetin siç mban shqiptarët. Përse Agaci i thotë, shko tek Kel Joti?

Rama: Është bisedë e nxjerrë nga konteksti.

Rakipi: Këto para t’i ka marrë Beçheti.

Rama: Ai do të marrë, aq sa mund të marrë ky televizioni nga fondi i CNN. Aq do të marrë edhe ai nga buxheti.

Me sa duket strategjia e kryeministrit funksionoi. Edi Rama i fitoi zgjedhjet dhe arriti të marrë mandatin e tretë si askush para tij. Por premtimi për të mos paguar Becchettin ka filluar të lëkundet. Biznesmeni italian ka nisur zyrtarisht ekzekutimin e gjobës duke bllokuar llogaritë e Shqipërisë në Albcontrol. Ndonëse institucionet shqiptare heshtin, prej javësh të ardhurat që Shqipëria duhet të përfitonte nga hapësira ajrore nuk vijnë më në llogarinë e Albcontrol, por shkojnë në llogarinë e sekuestruar nga Francesco Beccheti. Ndonëse qeveria ka kërkuar sërish zhbllokimin e llogarisë, tashmë hapësira ajrore e vendit prodhon para për Becchettin dhe jo më për Shqipërinë. Dhe bëhet fjalë për 2 milionë euro çdo muaj, të cilat kryeministri u zotua se nuk do të paguheshin asnjëherë.