Kreu i grupit parlamentar të LSI-së, Luan Rama, doli në prononcim për mediat, për t’iu kundërpërgjigjur deklaratës së kryeministrit Rama paraditen e sotme në Vorë, në lidhje me regjistrimin e pronave në hipotekë.
Gjatë një takimi me elektoratin e Vorës, Rama u shpreh se të paktën 3 mijë familje në këtë zonë nuk kanë mundur të regjistrojnë pronën e tyre, pasi në hipotekë u kërkohen para apo vota.
Në reagimin e tij, Luan Rama e quajti këtë deklaratë hipokrizi, ndërsa akuzoi Ramën se në zgjedhjet locale të viti 2015 ka bashkëpunuar me PD-në për t’i dhënë mundësinë të fitojë në këtë zonë.
“Ai tha se në gjithë bashkinë e Vorës janë 3 mijë familje që nuk kanë mundur të regjistrojnë pronat në hipotekë. 80 për qind të qarqeve dhe bashkisë së Tiranës e ka Rilindja. I ftoj qytetarët të marrin aktet e pronësisë meqë tani e ka vetë Rilindja këtë pjesë të tepsisë.
Me hipokrizi, ai ka marrë pjesë me disa veprimtari në zgjedhjet e Bashkisë së Vorës. Edhe në Vorë paska bërë të njëjtin pazar si në bashki të tjera”, tha ai.
Numri dy i LSI-së tha se partia e tij ka dhënë kontribut në arritjen e reformës në drejtësi, ndërsa Ramën e akuzoi për përpjekje për ta bërë këtë reformë siç i vinte për shtat atij.
“Kryetari gjunjëkëputur tha se LSI-ja ka ndihmuar vetëm me votat e saj për reformat dhe nuk ka bërë asgjë tjetër. Më lejoni të kujtoj reformën në drjetësi. Ne nuk e lejuam ta bënte siç e kishte ideuar ai, që të shërbente që edhe ky pushtet i pavarur të bëhej aneks i Rilindjes. Kontributi pozitiv i LSI-së bëri që reforma në drejtësi të miratohej me 140 vota në Parlament. Ju i keni të gjitha të regjistruara, tregojuni shqiptarëve se kush është gënjeshtari dhe hipokriti. Ka një problem kreu i Rilindjes, që e ka shfaqur sa herë kemi bërë takime për koalicionin. Problemet në raport me Rilindjen se ato me PS i ka mbyllur përfundimisht. Më 25 qershor qytetarët do të ndëshkojnë me votë këtë klloun të politikës, atë që e mbushi Parlamentin me banditë dhe të korruptuar”, tha ai.
Në fund, Luan Rama përmendi edhe trazirat e vitit 1997, duke iu referuar atyre si pasoja e përpjekjes për të marrë votat me anë të strukturave shtetërore. Duke iu referuar një deklarate të Ramës dy ditë më parë, për të cilën ai kërkoi falje publikisht, nënkryetari i LSI-së tha se përpjekje të ngjashme në vitin 1996 prodhuan trazirat e 1997-s.
“Çfarë kuptimi ka kur kryeministri i fton policët të marrin vota për Rilindjen. Ka ndodhur në 1996, kur Ushtria dhe SHIK-u u përdorën për të marrë vota dhe e pamë se çfarë pushteti marrin ata që e rrëmbejnë votën. Të gjithë e mbajmë mend se çfarë fati pësojnë ata që e ndërtojnë marrëdhënien me pushtetin mbi pushtetin e votës së vjedhur apo votës së marrë”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
