Shqipëria del nga lista gri e pastrimit të parave

Shqipëria ka dalë nga lista gri e Moneyval për pastrimin e parave. 

Lajmi u bë sot me dije nga ministri Ervin Mete në konferencën me Fondin Monetar Ndërkombëtar dhe Bankën e Shqipërisë. 

Është marrë vendimi nga FATF, Task Forca për Veprimin Financiar, për nxjerrjen e Shqipërisë nga lista gri, ashtu i njohur ndryshe si monitorim i shtuar.
Vendimi është marrë sot nga Asambleja Plenare e FATF dhe vjen si pasojë e progresit të shënuar nga vendi ynë në zbatimin e rekomandimeve. Ky është një vendim me një sërë ndikimesh pozitive, qoftë në aspektin reputacional, ashtu edhe në lehtësimin e kostove të transaksioneve financiare në sistemin bankar brenda dhe jashtë vendit.

Është një lajm inkurajues dhe motivues për ne për të vazhduar më tej forcimin e luftës kundër pastrimit të parave dhe financimit të terrorizmit, si edhe për të përmbushur në vazhdim angazhimet e ndërmarra me partnerët ndërkombëtarë”, tha ministri.

Shefja e misionit të FMN  në Shqipëri, Anke Weber, e konsideroi këtë një vendim të rëndësishëm.

Vendimi i fundit i FATF është një vendim i madh dhe i rëndësishëm për ta nxjerrë Shqipërinë nga lista gri. Tani është koha e duhur për të avancuar më tej drejt përmirësimit të mjedisit të biznesit për të ruajtur dhe zhvilluar kapitalin njerëzor dhe për të bërë përparim në zbutjen dhe përshtatjen e ndryshimeve klimatike”.

Kujtojmë që vendi ynë kishte hyrë në listën gri të Moneyval në shkurt të vitit 2020.