Koalicioni mes Lëvizjes Vetëvendosje dhe Lidhjes Demokratike të Kosovës me shumë gjasa rrezikon të marrë fund, dy muaj pas marrëveshjes për bashkëqeverisje.
Ka qenë kreu i LDK-së, Isa Mustafa, ai që deklaroi se dy aleatët kanë mospajtime rreth heqjes së tarifës 100% për inicimin e dialogut me Serbinë, një qëndrim ky që po rrezikon edhe partneritetin me SHBA-në.
"Ne nuk shohim më mundësi dhe bashkëqeverisje me Vetëvendosjen ... Andaj, do të marrim iniciativë të mocionit të mosbesimit ndaj qeverisë dhe mandej mbetët përgjegjësi e të gjitha partive politike, dhe institucioneve të vendit që të gjejnë zgjidhje si të dilet nga kjo situatë", tha Mustafa.
Tensionet në koalicion u theksuan të mërkurën kur kryeministri Albin Kurti shkarkoi Agim Veliun nga pozita e ministrit të Brendshëm.
Shkarkimi i tij, erdhi për shkak të një deklarate se epidemia e koronavirusit po infektonte nga ora në orë qytetarë të shumtë dhe se kërkesa e presidentit Thaçi, për shpalljen e gjendjes së jashtëzakonshme në vend, ishte e justifikuar.
Megjithatë, kjo deklaratë, për Albin Kurtin ishte tradhti ndaj qeverisë dhe rendit.
"Nuk mundet një ministër t’ia mbajë ison idesë së presidentit për një ide nga e cila presidenti u zmbraps sot... Duhet të presim se çka do bëjnë e veprojnë, e pastaj të përgjigjemi për mocionin e LDK-së. tash duhet të përqendrohemi me gjithë kabinetin qeverisës për luftimin e virusit korona", u shpreh, kryeministri Kurti.
Nga ana tjetër, kreu i LDK-së, Mustafa, nuk sheh mundësi për zgjedhje të jashtëzakonshme edhe nëse qeveria nuk merr votëbesimin, për shkak të situatës emergjente me të cilën përballet vendi, me koronavirusin.
Nga radhët e opozitës, po konsolidohet qëndrimi në favor të mocionit të mosbesimit.
"AAK-ja do të votojë për këtë mocion, sepse qeveria Kurti jo vetëm që do të jetë qeveria më jetëshkurtër, por edhe më e dëmshja për Kosovën," informoi të enjten ish-kryeqeveritari Ramush Haradinaj pas takimit me homologun e LDK-së.
Kushtetuta e Kosovës, sqaron se mocioni i mosbesimit ngrihet me propozimin e një të tretës së deputetëve dhe, kur përkrahet nga shumica, çon në dorëheqjen e qeverisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
