Begaj, mesazh për zgjedhjet: Shit-blerja e votës dhe manipulimet janë të patolerueshme

Presidenti Bajram Begaj ka dhënë sot një mesazh drejtuesve të institucioneve dhe strukturave të angazhuara me zgjedhjet.

Kreu i shtetit thekson se një proces zgjedhor i drejtë e i paanshëm, i bazuar në kushtetutë e ligj, detyrim thelbësor ndaj vendit.

Ndër të tjera Presidenti shprehet se: “Shit-blerja e votës, keqpërdorimi i burimeve shtetërore janë të patolerueshme”, duke shtuar se: “Financimet e paligjshme dhe jo transparente të partive politike, manipulimi zgjedhor janë të patolerueshme”.

Po ashtu kreu i shtetit u bëri thirrje partive politike që të mos denigrojnë njëri-tjetrin.

“Media, aktor i rëndësishëm për garantimin e një proces sa më të lirë. Zgjedhjet, rol vendimtar për forcimin e besimit në institucionet e vendit dhe anëtarësimin në BE. Tek unë do të gjeni dëgjuesin e vëmendshëm, tek Institucioni i Presidentit mbështetje të palëkundur. Në asnjë rrethanë nuk duhet të shtrembërohet dhe tjetërsohet vullneti dhe vota e lirë”, theksohet në deklaratë.

Presidenti Begaj shton se: “Çdo intimidim apo shantazh duhet të denoncohet e dënohet!”, dhe se “Zgjedhjet nuk janë të partive politike, por  janë për qytetarët shqiptarë, janë për Shqipërinë”.