Drejtori i Përgjithshëm i Policisë së Shtetit, Drejtues Madhor Skënder Hita, i shoqëruar nga drejtues të lartë të Policisë së Shtetit, zhvilloi një vizitë në familjen e Dëshmorit të Atdheut, Inspektor Enea Mekolli, me rastin e ditëlindjes së djalit të tij.
Gjatë vizitës, Drejtori i Përgjithshëm i dorëzoi familjes së Dëshmorit medaljen e mirënjohjes së akorduar për Inspektorin Enea Mekolli për aktin e tij sublim në krye të detyrës, dokumentacionin që njeh djalin e tij me statusin “Fëmijë në përkujdesje të Republikës”, si dhe një çek simbolik në vlerën 7 milionë lekë të rinj, kontribut i punonjësve të Policisë së Shtetit në shenjë solidariteti.
E di që asnjë fjalë dhe asnjë mbështetje nuk mund ta zëvendësojë Enean. Unë nuk jua kthej dot Enean tonë, por dua t’ju siguroj se nuk do të jeni kurrë vetëm. Policia e Shtetit, çdo punonjës policie, Ministria e Brendshme dhe Qeveria Shqiptare do të jenë gjithmonë pranë jush.
Ai theksoi gjithashtu se kujdesi për familjen e Dëshmorit është një detyrim moral dhe institucional.
Ky është një kontribut i mbledhur me zemër nga punonjësit e Policisë së Shtetit, si një shenjë respekti, mirënjohjeje dhe solidariteti për sakrificën sublime të Eneas.
Drejtori i Përgjithshëm shtoi se djali i Dëshmorit do të përfitojë deri në përfundimin e arsimit të lartë të gjitha të drejtat që parashikon ligji, përfshirë mbështetje financiare, arsim dhe shërbim shëndetësor falas.
Ne kemi detyrimin moral dhe institucional të kujdesemi për familjen e tij dhe këtë detyrim do ta përmbushim me përgjegjësi dhe përkushtim.
Familjarët e Dëshmorit, mes dhimbjes dhe krenarisë, shprehën mirënjohjen për mbështetjen e vazhdueshme të Policisë së Shtetit që nga dita e rënies në detyrë të Inspektorit Enea Mekolli, si dhe falënderuan të gjithë punonjësit për solidaritetin e treguar ndaj familjes së tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
