“Qatargate”, PE nis procesin për t’u hequr imunitetin dy eurodeputetëve të përfshirë në skandal

Parlamenti Evropian tha të hënën se kishte filluar një procedurë për heqjen e imunitetit të dy prej anëtarëve të tij pas një kërkese nga gjyqësori belg që hetonte skandalin e korrupsionit Bashkimi Evropian-Katar.

Dy burime pranë hetimit i thanë Reuters se dy eurodeputetët janë belgu Marc Tarabella dhe italiani Andrea Cozzolino, të dy anëtarë të Grupit të Aleancës Progresive të Socialistëve dhe Demokratëve në Parlamentin Evropian.

“Pas një kërkese të autoriteteve gjyqësore belge, kam nisur një procedurë urgjente për heqjen e imunitetit të dy anëtarëve të Parlamentit Evropian. Nuk do të ketë pandëshkueshmëri. Asnjë”, tha presidentja e PE Roberta Metsola në Twitter.

Avokati i Tarabellës, Maxim Toller, tha se klienti i tij ishte në favor të heqjes së imunitetit. Më parë, Tarabella mohoi keqbërjen, duke thënë në një deklaratë se ai nuk kishte "absolutisht asgjë për të fshehur" dhe "do t'u përgjigjej të gjitha pyetjeve të hetuesve".

Reuters gjithashtu u përpoq të kontaktonte Cozzolinon për një koment, por pa sukses. Muajin e kaluar, ai u kishte thënë agjencive italiane të lajmeve se nuk ishte nën hetim në atë kohë. “Nuk jam marrë në pyetje. Nuk jam kontrolluar”, tha ai atëherë.

Në dhjetor, dy burime me njohuri të drejtpërdrejta për këtë çështje i thanë Reuters se Francesco Giorgi, një nga të dyshuarit kryesorë në hetim, së bashku me partneren e tij, zëvendëspresidenten e Parlamentit Evropian të rrëzuar Eva Kaili, pranoi se kishte marrë ryshfet nga Katari për të ndikuar në vendimet e Parlamentit Evropian.

Vetë Kaili është shprehur përmes avokatit se është e pafajshme. Sipas burimeve, Giorgi, një asistent parlamentar i BE-së, tha se dyshonte se Tarabella dhe Cozzolino kishin marrë para nga Katari. Nuk dihet nëse Giorgi ka dhënë ndonjë provë për akuzat e tij kundër Tarabellës dhe Cozzolinos.

Më 22 dhjetor, një gjykatës belg vendosi që Kaili do të qëndronte në paraburgim edhe për një muaj, ndërsa hetimi vazhdon për korrupsionin që përfshin Katarin, mikpritësin e Kupës së Botës, një nga skandalet më të mëdha të korrupsionit që ka goditur BE-në.