Policia Kufitare ka ndëshkuar me masë administrative prej 500 mijë lekësh të rinj drejtuesin e një mjeti lundrues, pasi u konstatua duke lundruar me shpejtësi brenda perimetrit të sigurisë të dedikuar për pushuesit në plazhin e Shëngjinit.
Sipas Policisë, shërbimet e Policisë Kufitare dhe Njësisë Policore Detare, gjatë monitorimit të vijës bregdetare në bashkëpunim me Drejtorinë Vendore të Policisë Lezhë, evidentuan mjetin lundrues që kishte hyrë në zonën e rezervuar për pushuesit, duke rrezikuar jetën dhe sigurinë e personave që po pushonin në plazh.
Pas verifikimeve dhe kryerjes së veprimeve procedurale, drejtuesi i mjetit, shtetasi me iniciale D. M., u gjobit me 500 mijë lekë të rinj, ndërsa mjeti lundrues u bllokua.
Policia e Shtetit falënderoi qytetarët për bashkëpunimin dhe denoncimet, duke theksuar se çdo rast trajtohet me seriozitet dhe verifikohet menjëherë për të garantuar sigurinë në hapësirat bregdetare.
Njëkohësisht, autoritetet u bëjnë thirrje drejtuesve të mjeteve lundruese dhe subjekteve që operojnë me to të respektojnë rregullat e lundrimit dhe perimetrat e sigurisë, duke paralajmëruar se çdo shkelje do të ndëshkohet menjëherë për të mbrojtur jetën dhe sigurinë e pushuesve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
