28 prilli, Dita Ndërkombëtare e Sigurisë dhe Shëndetit në Punë

Sot në mbarë botën shënohet Dita Ndërkombëtare e Sigurisë dhe Shëndetit në Punë

Në këtë datë, në shumë vende të botës, autoritetet kombëtare, sindikatat, organizatat e sigurisë dhe të shëndetit në punë dhe punëdhënësit, organizojnë aktivitete të shumta

28 prilli është gjithashtu një ditë, në të cilën sindikatat në botë përkujtojnë dhe nderojnë kujtimin e viktimave të aksidenteve dhe sëmundjeve në punë.

Çdo vit në këtë ditë mbahen aktivitete dhe fushata ndërgjegjësimi me qëllim përqendrimin e vëmendjes ndërkombëtare mbi tendencat e reja në fushën e sigurisë dhe shëndetit në punë, si dhe rëndësinë e problemeve të lidhura me lëndimet, sëmundjet dhe vdekjet në vendin e punës.

Në vitin 2003, Organizata Ndërkombëtare e Punës (ILO), filloi të shënojë Ditën Botërore me qëllim që të theksojë parandalimin e aksidenteve dhe sëmundjeve në punë, duke përfituar nga pikat e forta tradicionale të ILO-s të trepartizmit dhe dialogut social.

Kjo festë është një pjesë integrale e Strategjisë Globale për Sigurinë dhe Shëndetin në Punë të ILO-s, siç është dokumentuar në Konkluzionet e Konferencës Ndërkombëtare të Punës në qershor 2003.