Të humbasësh 50 kilogramë brenda gjashtë muajve nuk është e lehtë.
Kjo është historia e transformimit të të riut sipërmarrës Enzo Brojka, i cili vendosi të ndryshojë rrënjësisht stilin e jetës dhe të rikthejë shëndetin e tij.
Për shikuesit e programit të mëngjesit “Zgjohu me MCN”, Enzo rrëfeu sfidën e tij me mbipeshën dhe vendimin për të ndjekur një regjim të rreptë ushqimor dhe aktivitet fizik intensiv për një periudhë gjashtëmujore, duke arritur rezultate maksimale.
Duket e thjeshtë kur e dëgjon, por në të vërtetë të heqësh 60 kilogramë në 6 muaj kërkon shumë sakrifica, disiplinë dhe net pa gjumë. Duhet të ndryshosh gjithçka në jetën tënde.
Deri në moshën rreth 20-vjeçare kam qenë aktiv dhe nuk ka pasur probleme me peshën. Me kalimin e kohës, për shkak të punës dhe ushqyerjes së pashëndetshme, kryesisht fast food-it, gradualisht mora peshë për rreth 8 vite, duke arritur në 138.5 kilogramë.
Mbipesha u kthye në një lloj sëmundjeje. Nuk ushqehesha më sepse kisha uri, por nga varësia dhe nepsi. Nuk e kontrolloja dot veten. Kisha probleme me frymëmarrjen, me gjumin dhe të gjithë ma vinin në dukje.
Pika kulmore erdhi pas një periudhe të gjatë hezitimi. Gjatë pushimeve në qershor, ai u përball me veten para pasqyrës dhe pasi u peshua, mori vendimin përfundimtar.
Thashë me vete: ose e nis tani, ose kurrë. Jo nesër, por sot.
Fillimisht, ndoqa një regjim ushqimor me faza dhe deficit ekstrem kalorik, duke humbur 13 kilogramë brenda një muaji. Megjithatë, e kuptova se ky ritëm ishte i gabuar dhe i lodhshëm, si fizikisht ashtu edhe mendërisht.
Më pas, kalova në një ushqyerje më të balancuar, me fokus te proteinat, duke e kombinuar me ecje të përditshme në mëngjes rreth Liqenit Artificial. Pas kësaj, nisa palestrën dhe u përfshiva në crossfit, ku, komuniteti dhe motivimi luajtën një rol kyç.
Bëja ecje në mëngjes, ushqehesha mirë gjatë ditës dhe në darkë bëja crossfit.
Stërvitesha 6 herë në javë dhe vazhdoj ta beje akoma çdo ditë. Kisha vendosur një objektiv të qartë, në gjashtë muaj të humbisja 50 kilogramë.
Sipas Enzos, vendosja e një qëllimi konkret dhe disiplina e përditshme ishin çelësi i suksesit.
Sot ndihem sikur kam rilindur. Jeta ime ka ndryshuar totalisht dhe tani ky proces më pëlqen.
Nuk është më sakrificë, por mënyrë jetese.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
