Në një prononcim për mediat, nga Korça presidenti Ilir Meta vlerësoi se demokracia në vend është në një gjendje problematike.
Sipas tij, pas 25 prillit janë mundësitë për rivendosjen e plotë të demokracisë funksionale, ndërsa shprehet se shpreson që opozita të përmbushë përgjegjësinë e saj në parlament dhe institucionet e tjera të rimarrin veten.
Sa i takon situatës së demokracisë edhe ajo kuptohet që është në gjendje problematike. Është shumë më mirë se situata katastrofike para 25 prillit në kushtet e mungesës së një parlamenti kushtetues dhe funksional, në kushtet e zero opozitës në institucionet vendore. Pas 25 prillit janë mundësitë për rivendosjen e plotë të demokracisë funksionale dhe ai është qëllimi ynë kryesor dhe duhet të jetë i të gjithë qytetarëve që zëri i tyre të dëgjohet. Besoj se protagonizmi im nuk ka qenë i kërkuar nga Ilir Meta por i imponuar në mbrojtje të demokracisë në kushtet e braktisjes nga opozita të institucioneve dhe në kushtet e maxhorancës për të kapur çdo institucion, në mënyrë të veçantë Gjykatën Kushtetuese dhe për të krijuar një situatë të pashpresë për demokracinë dhe ndryshimin. Jam i detyruar të respektoj kushtetutën. Askush nuk duhet të presë detyrat që u takojnë aktorëve të tjerë. Shpresojmë që opozita të përmbushë përgjegjësitë e saj në parlament dhe institucionet e tjera të rimarrin veten dhe të respektojnë kushtetutën e Republikës së Shqipërisë.
Presidenti Meta i bëri këto komente nga Korça ku ka dekoruar katër të përndjekur politikë, simbole të rezistencës antikomuniste. Kreu i Shtetit ka dekoruar të përndjekurit Ylber Merdani, Shpresa Ballolli Merdani, Nevruz Golka dhe Petrit Bazelli.
Ata përjetuan përndjekje e dhimbje të jashtëzakonshme. Ish të përndjekurit vlerësohen si simbole të rezistencës. Nderojmë qëndresën dhe sakrificën e katër të përndjekurve. Ata janë shembull të vetëdijes qytetare dhe kombëtare, si dhe shembull frymëzues për brezat e sotëm e të ardhshëm. Ata bënë gjithçka për të vendosur demokracinë në Shqipëri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
