Nëntë ish-zyrtarët e Ministrisë së Brendshme, ndaj të cilëve një ditë më parë u lëshuan urdhër-arrestet lidhur me tenderin e uniformave të policisë, pritet që të hënën të dalin para gjykatës për njohjen me masat e sigurisë.
Dosja penale ndaj Edlira Naqellarit, Kreshnik Bejkajt, Ani Omurit, Klevis Hasanit, Anisa Bogdanit, Flutura Çekrezit, Fatmir Demnerit, Mariglen Buzalit dhe Gëzim Mingajt sipas burimeve nga SPAK ka zbardhur rolin e gjithësecilit në këtë aferë.
Këtë fakt e konfirmojnë burime zyrtare pranë grupit të hetimit, të cilët kanë mundur që të mbyllin brenda një kohë të shkurtër hetimet, ndërsa delegimi i dosjes në gjykatë pritet të bëhet brenda muajit shtator.
Të pandehurit janë akuzuar si të përfshirë në dhënien e tenderit korruptiv të zhvilluar një vit më pare në kohën kur kjo ministri drejtohej nga Sandër Lleshaj. Hetimet e kryera nga SPAK kanë rezultuar se të pandehurit janë zyrtarë apo ish-zyrtarë të MB, si dhe anëtarë të komisionit të vlerësimit për tenderin e uniformave, që kap vlerën e rreh 25 milion eurove.
Deri më tani janë ekzekutuar 8 urdhër-arreste, ndërsa janë kryer kontrolle në banesat e të akuzuarve. Prokurorët nuk bëjnë me dije nëse në banesat e tyre janë gjetur dokumente apo vlera monetare që kompromentojnë pozicionin e tyre.
Për personat e akuzuar, Prokuroria e Posaçme kërkon masat e arrestit me burg dhe arrest shtëpiak.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
