Presidenti i Shteteve të Bashkuara të Amerikës, Donald Trump, e ka anuluar udhëtimin e planifikuar në Danimarkë dhe e ka shtyrë takimin me kryeministren daneze, Mette Frederiksen, pasi që ajo tha se Grenlanda nuk është në shitje.
Duke folur gjatë qëndrimit në Grenlandë, kryeministrja Frederiksen tha se blerja e Grenlandës, e cila është territor autonom i Danimarkës, është diskutim absurd.
Përmes një postimi në Twitter të martën në mbrëmje, presidenti amerikan tha se ai ka vendosur ta shtyjë takimin me shefen e qeverisë daneze pasi ajo nuk ka interesim që të diskutojë për blerjen e Grenlandës.
“Danimarka është një vend shumë i veçantë me njerëz të mrekullueshëm, por duke u bazuar në komentet e kryeministres Mette Frederiksen se ajo nuk është e interesuar të bisedojë për shitjen e Grenlandës, unë do ta shtyj takimin tonë të planifikuar për një kohë tjetër”, shkroi presidenti Trump.
Kjo ide është paraqitur edhe më parë nga Shtetet e Bashkuara. Ky shtet ia kishte ofruar Danimarkës 100 milionë dollarë për blerjen e Grenlandës më 1946 pasi oferta për shkëmbim territoresh me Alaskën ishte refuzuar, shkruan “The Guardian”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
