Julian Assange martohet në burg me ish-avokaten e tij

Themeluesi i WikiLeaks, Julian Assange, do të martohet këtë të mërkurë me ish-avokaten e tij, Stella Moris.

Ceremonia do të zhvillohet në burgun e sigurisë maksimale të Britanisë, nga ku bashkëthemeluesi i WikiLeaks vazhdon të luftojë kundër ekstradimit të tij në Shtetet e Bashkuara.

Ceremonia do të zhvillohet në prani të një grupi të vogël njerëzish: vetëm katër të ftuar dhe dy dëshmitarë. Por mbështetësit e tyre janë të ftuar të udhëtojnë në periferi të burgut Belmarsh në Londrën juglindore të veshur si për të marrë pjesë në dasmë. Dizajnerja britanike Vivienne Westwood, e cila është shumë e përkushtuar për kauzën e Julian Assange, ka dizajnuar veshjen që Assange do të veshë për këtë rast si dhe fustanin e nusërisë së Moris.

I përfshirë në një sagë të gjatë ligjore, 50-vjeçari australian kërkohet nga gjykatat amerikane që duan ta gjykojnë për shpërndarjen, që nga viti 2010, të mbi 700,000 dokumenteve konfidenciale mbi aktivitetet ushtarake dhe diplomatike amerikane, veçanërisht në Irak dhe Afganistan. 

Më 14 mars, ai pa një nga shpresat e tij të fundit për të shmangur ekstradimin e tij të zhdukej, pas refuzimit të Gjykatës së Lartë Britanike për të shqyrtuar apelin e tij.

Assange dhe Moris u takuan për herë të parë në vitin 2011 kur avokatja u punësua për t'iu bashkuar ekipit ligjor që luftonte ekstradimin. Moris kishte dy fëmijë me Assange, dy djem të ngjizur kur ai jetonte në ambasadën e Ekuadorit në Londër. Moris, me rastin e dasmës, nisi një mbledhje fondesh për të kontribuar në shpenzimet ligjore që dje tashmë kishin mbledhur mbi 177,000 paund (212,000 euro).