Udhëheqësi suprem i talebanëve ka lëshuar një urdhër i cili ndalon ndërtimin e dritareve në ndërtesat e banimit që shohin zonat e përdorura nga gratë afgane dhe duke kërkuar që ato ekzistuese të bllokohen.
Sipas një deklarate të lëshuar pasditen e së shtunës nga zëdhënësi i qeverisë talebane, ndërtesat e reja nuk duhet të kenë dritare përmes të cilave është e mundur të shihet “oborri, kuzhina, pusi i fqinjëve dhe vende të tjera që zakonisht përdoren nga gratë”.
“Të shohësh gra duke punuar në kuzhina, në oborre ose duke mbushur ujë nga puset mund të çojë në akte të turpshme”, sipas dekretit të postuar nga zëdhënësi i qeverisë Zabihullah Mujahid në platformën e mediave sociale X.
Autoritetet komunale dhe departamentet përkatëse duhet të monitorojnë kantieret e ndërtimit për t’u siguruar që nuk mund të shihet në shtëpitë e fqinjëve.
Në rast se ekzistojnë dritare të tilla, pronarët do të inkurajohen të ndërtojnë një mur ose të pengojnë pamjen për të shmangur shqetësimet e shkaktuara për fqinjët, thuhet në dekret.
Që nga kthimi i talebanëve në pushtet në gusht 2021, gratë janë fshirë në mënyrë progresive nga hapësirat publike, duke bërë që Kombet e Bashkuara të denoncojnë “aparteidin gjinor” që ka krijuar administrata.
Autoritetet talebane kanë ndaluar arsimin pas atij fillor për vajzat dhe gratë, kanë kufizuar punësimin dhe kanë bllokuar aksesin në parqe dhe vende të tjera publike.
Një ligj i kohëve të fundit i ndalon gratë të këndojnë ose recitojnë poezi në publik, nën zbatimin ekstremisht të rreptë të ligjit islamik nga qeveria talebane.
Gjithashtu i inkurajon që të “mbulojnë” zërat dhe trupat e tyre jashtë shtëpisë.
Disa radio dhe televizione lokale e kanë ndaluar transmetimin e zërave të femrave.
Por administrata talebane pretendon se ligji islamik garanton të drejtat e burrave dhe grave afgane.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
