Protesta e opozitës, ambasada e SHBA: Jo thirrje për dhunë

Ndërsa na ndajnë më pak se 24 orë nga protesta e paralajmëruar e opozitës më 16 mars, Ambasada e Shteteve të Bashkuara të Amerikës në Tiranë u bën thirrje organizatorëve që të mos nxisin dhunë.

Nëpërmjet një deklarate, ambasada e SHBA shprehet se i njeh zgjedhjet e 2017-s dhe e konsideron parlamentin legjitim. 

Më tej, ambasada amerikane kritikon opozitën, e cila ka djegur mandatet se ka me këtë veprim ka hequr dorë nga përgjegjësitë që u ka ngarkuar populli me votëbesimin e tyre.

“Ata ish anëtarë të Parlamentit, të cilët vendosën të braktisin mandatet, hoqën dorë nga detyrimet e tyre, ndaj qytetarët shqiptarë, duhet të lejojnë ata që duan të punojnë për të ardhmen e vendit të bëjnë punën e tyre”, theksohet në deklaratën e ambasadës. 

Reagimi i Ambasadës Amerikane

Pavarësisht se protesta paqësore është një shtyllë themelore e demokracisë, nxitja apo kryerja e veprimeve të dhunshme, përfshirë edhe shkatërrimin e pronës publike, janë të paligjshme. Ne i nxisim të gjithë aktorët e demokracisë shqiptare që të ushtrojnë vetëpërmbajtje në protestën e 16 marsit. Ambasada e Shteteve të Bashkuara i konsideron Qeverinë dhe Parlamentin aktual të Shqipërisë të zgjedhura në mënyrë legjitime nëpërmjet zgjedhjeve të vitit 2017, të njohura ndërkombëtarisht. Ne vlerësojmë punën e mirë që është bërë në zbatimin e reformës në drejtësi në Shqipëri, si dhe përparimin në luftën kundër korrupsionit dhe krimit të organizuar. Ka ende punë për të bërë. Ndërkohë që, ata ish anëtarë të Parlamentit të cilët vendosën të braktisin mandatet, hoqën dorë nga detyrimet e tyre ndaj qytetarëve shqiptarë, duhet të lejojnë ata që duan të punojnë për të ardhmen e vendit të bëjnë punën e tyre. Ne mbështesim të gjithë ata që vazhdojnë të jenë të përfshirë në procesin demokratik në Parlament, në mënyrë që Shqipëria të vazhdojë të ecë përpara, drejt anëtarësimit në Bashkimin Europian.