Sulmet në Ukrainë/ Basha: Qeveria të marrë masa, transparencë për rezervat e shtetit

Kreu i Partisë Demokratike Lulzim Basha ka kërkuar transparencë nga qeveria për gjendjen e rezervave të shtetit. 

Në një deklaratë për mediat Basha ka shprehur mbështetjen për popullin e Ukrainës, ndërsa deklaroi se siguria jonë nuk është në rrezik të drejtpërdrejtë, kjo falë faktit se Shqipëria është edhe anëtare e NATOs.

Ai shton më tej se kjo do të ketë ndikim të drejtpërdrejtë në ekonomi prandaj kërkon nga qeveria që të bëjë transparente masat që ka ndërmarrë për t’u ardhur në ndihmë familjeve në nevojë.

Ndërsa ndjekim me shqetësim sulmin brutal dhe të paprovokuar të Rusisë mbi Ukrainën dhe qëndrojmë të vendosur pranë popullit të Ukrainës në këto ditë të vështira, me shpresën që ky agresion kundër një shteti sovran, në shkelje të së drejtës ndërkombëtare do të ndalojë sa më parë, këtu, në vendin tonë, na lind detyra që të minimizojmë sa më parë pasojat e kësaj lufte. Sot siguria jonë nuk është në rrezik të drejtpërdrejtë, edhe falë faktit se Shqipëria është anëtare e NATOs. Por është e qartë për të gjithë, se agresioni rus ndaj Ukrainës pritet të ndikojë negativisht në ekonomi,  nga çmimet e drithërave dhe vështirësimi i sigurimit të tyre, tek çmimi i karburanteve, dhe për rrjedhojë edhe i produkteve dhe shërbimeve të tjera.

Për këtë arsye sot i bëj thirrje qeverisë shqiptare të bëjë transparencë mbi gjendjen e rezervave të shtetit, mbi planin e masave  apo për masat që ka ndërmarrë për t’u ardhur në ndihmë familjeve në nevojë, të cilat edhe ne kushtet aktuale e kanë të vështirë të përballojnë nevojat bazë. Gjendja ekonomike e shqiptarëve, edhe përpara zhvillimeve të fundit është e qartë për të gjithë. Sipas të dhënave, më shumë se gjysma e popullsisë ne vend sot e kanë të vështirë të sigurojnë ushqim të mjaftueshëm për fëmijët e tyre