Kreu i grupit parlamentar të PS-së, Taulant Balla, e konsideron të domosdoshëm opinion e Komisionit të Venecias lidhur me ngërçin e Gjykatës Kushtetuese. Në një mesazh në Tuiter, Balla shkruan se Kuvendi duhet të rishikojë legjislacionin për të shmangur krijimin e situatave që pengojnë në mënyrë abuzive funksionimin e organeve kushtetuese.
“Sa kohë kundërshtarët e Reformës në Drejtësi vijojnë tentativat për pengimin e saj, Kuvendi duhet të rishikojë legjislacionin për të shmangur krijimin e situatave që pengojnë në mënyrë abuzive funksionimin e organeve kushtetuese”, shkruan Balla.
Ndërkohë, sekretari i Përgjithshëm i Partisë Demokratike, Gazmend Bardhi, reagoi sot në lidhje me mundësinë e një kërkese të tillë drejtuar Komisionit të Venecias. Bardhi shprehet se një hap i tillë nuk do të çonte asgjëkundi, por thjesht do të vononte ngritjen e Gjykatës Kushtetuese.
“Lidhur me dërgimin e çështjes në Komisionin e Venecias, Partia Demokratike shpreh bindjen se për Shqipërinë dhe qytetarët e saj është me rëndësi themelore vënia në funksionim sa më parë e Gjykatës Kushtetuese. Duke patur në konsideratë se Komisioni i Venecias nuk jep vendime por opinione, e vetmja pasojë do të ishte vonesa e bërjes funksionale të Gjykatës Kushtetuese dhe hapja e një debati tjetër mbi lexime të kundërta të cfarëdo opinioni të Komisionit të Venecias nga palët. Shqipëria nuk mund të vazhdojë të mbetet peng i këtyre debateve. Shqiptarët nuk meritojnë të mbeten për muaj të tjerë pa Gjykatë Kushtetuese”, tha Bardhi në emër të selisë blu.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
