Një zyrtar shëndetësor po hetohet për vaksinimin e 30 nxënësve me një shiringë të vetme në shtetin qendror të Indisë, Madhya Pradesh.
Ngjarja ndodhi në një shkollë në distriktin Sagar ku fëmijëve u jepeshin vaksinat kundër Covid-19.
Ministria e Shëndetësisë e Indisë mandaton një protokoll "një gjilpërë, një shiringë, vetëm një herë" për vaksinat Covid-19. India ka administruar mbi 2.03 miliardë vaksina Covid-19 deri më tani.
Shiringat një përdorimshe përdoren gjerësisht në Indi për të shmangur përhapjen e sëmundjeve vdekjeprurëse si HIV.
Megjithatë, ka pasur incidente të shumta në të kaluarën ku një shiringë e vetme është ripërdorur në spitale për shkak të mungesës së pajisjeve.
Jitendra Rai, i cili po vaksinonte fëmijët, tha për mediat se atij i ishte dhënë vetëm një shiringë nga departamenti i shëndetësisë dhe ai thjesht po zbatonte urdhrat.
Prindërit që kishin shoqëruar fëmijët e tyre e vunë re këtë çështje dhe e raportuan tek autoritetet e shkollës.
Ndaj tij Drejtoria e Shëndetësisë ka regjistruar një rast nga pakujdesia. Ndërkohë, ka nisur një hetim edhe ndaj zyrtarit përgjegjës për dërgimin e pajisjeve për aksionin e vaksinimit.
Një zëdhënës i partisë opozitare të Kongresit ka kërkuar që ministri i shëndetësisë i shtetit të japë dorëheqjen për incidentin.
India është vendi i dytë pas Kinës që ka kaluar kufirin e dy miliardë vaksinave kundër Covid. Sipas ministrisë së shëndetësisë të Indisë, 98% e të rriturve kanë marrë të paktën një dozë të vaksinës Covid, ndërsa 90% janë vaksinuar plotësisht.
Të mërkurën, vendi raportoi 18,313 raste ditore për 24 orët e fundit dhe 57 vdekje të lidhura me Covid.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
