
Sipas të dhënave të INSTAT-it, gratë në Shqipëri drejtojnë ose zotërojnë rreth 25% deri në 31% të ndërmarrjeve aktive në vend.
Të ftuara në emisionin “MCN live”, ekspertet e ekonomisë Elteva Treska dhe Blerta Gazidede analizuan sfidat reale që hasin gratë sipërmarrëse dhe arsyet pse pesha e tyre në treg mbetet ende e kufizuar.
Ekspertja Elteva Treska u shpreh se nga përditshmëria e punës me sipërmarrjet vihet re qartë se numri i grave që marrin guximin për të nisur një aktivitet të tyren është ende i vogël, pasi hapja e një biznesi kërkon kapital dhe mbështetje të konsiderueshme.
Përballjen nga mëngjesi deri në darkë e kam me bizneset.
Pavarësisht statistikave, kuptoj qartë kush drejtohet nga burrat dhe kush nga gratë, dhe normalisht numri i këtyre të fundit është i vogël.
Që të hapësh një biznes duhet të kesh kapital dhe suport.
Shikoj një numër të vogël grash që marrin kurajon dhe rrezikun për të hapur qoftë edhe një biznes të vogël, i cili më pas rritet gradualisht.
Pengesat kryesore ndahen në dy plane, mendësia sociale që ende i ngarkon gratë me barrën kryesore të familjes dhe vështirësitë ekonomike e mungesa e kohës.
Gratë nga natyra janë të forta dhe me rritjen e të ardhurave po rritet edhe guximi i tyre për të sfiduar veten në treg.
Nga ana tjetër, ekspertja Gazidede theksoi se kostot e larta që në ditën e parë të çeljes së një biznesi të ri dhe mungesa e mbështetjes i bëjnë gratë të jenë më të kujdesshme dhe t'i hedhin hapat më ngadalë se burrat.
Mbështetja është zero, ndërkohë që detyrimet nisin që në momentin e parë. Kostoja e një biznesi të ri është shumë e lartë dhe shpesh nuk ka asnjë suport.
Meshkujt janë më të guximshëm në marrjen e rrezikut, ndërsa gratë i hedhin hapat më ngadalë.
Sipërmarrja e grave është e përqendruar kryesisht te biznesi i vogël dhe sektori i shërbimeve.
Një pjesë e mirë e bizneseve që figurojnë në emër të grave, në realitet udhëhiqen dhe menaxhohen nga burrat.
