Një gjerman i dënuar me vdekje në Bjellorusi është shfaqur në televizionin shtetëror në vend, i përlotur dhe i lutet qeverisë gjermane që të ndërhyjë në rastin e tij.
“Zoti Scholz, ju lutem, unë jam ende gjallë... nuk është ende vonë,” tha Rico Krieger, i cili u fotografua i prangosur brenda një qelie, duke i bërë thirrje kancelarit gjerman, Olaf Scholz.
Autoritetet në Bjellorusi, një shtet diktatorial ku torturat dhe gjyqet e politizuara janë të përhapura, pretendojnë se Krieger, 30 vjeç, udhëtoi në Bjellorusi vjeshtën e kaluar me urdhër të inteligjencës ukrainase, me qëllimin për të kryer një sulm terrorist në një linjë hekurudhore.
“Ky ishte gabimi më i madh i jetës sime. Unë e pranoj fajin tim, pa dyshim”, tha Krieger në një pjesë të intervistës ku gjermanishtja origjinale dëgjohej nën një përkthim zanor në gjuhën ruse. Në disa momente gjatë programit televiziv 17-minutësh ai u shpërtheu duke qarë.
KGB-ja, siç njihet ende shërbimi sekret bjellorus, ka një histori të falsifikimit të provave dhe nxjerrjes së rrëfimeve nën tortura, duke hedhur dyshime mbi besueshmërinë e pretendimeve të bëra në program. Gjithsesi nuk u dha asnjë provë mbështetëse për krimet e supozuara të Krieger.
Sipas një profili të LinkedIn, Krieger ka punuar më parë si punonjës mjekësor për Kryqin e Kuq Gjerman dhe si oficer sigurie në ambasadën amerikane në Berlin.
Kryqi i Kuq Gjerman konfirmoi se ai kishte punuar për të dhe gazeta e përditshme gjermane Tagesspiegel citoi të premten një ish-koleg nga organizata duke thënë se Krieger u kishte thënë atyre se ishte rekrutuar për të udhëtuar në Ukrainë.
“Ne të gjithë menduam se ai po shkonte si mjek,” tha kolegu.
Krieger tha se ai ishte motivuar të punonte për Ukrainën pasi kishte lexuar në lajme për luftën e Rusisë në vend dhe se kuratorët e tij i dhanë një detyrë për të kryer në Bjellorusi përpara se të udhëtonte në Ukrainë.
Programi pretendonte se ai bëri disa fotografi të vendeve të ndjeshme dhe më pas vendosi një çantë shpine me eksploziv pranë një binar hekurudhor. Thuhet se shpërthimi i mëvonshëm nuk ka lënduar askënd.
Bjellorusia është i vetmi vend evropian që ruan dënimin me vdekje. Dënimet kryhen me një plumb të vetëm në pjesën e pasme të kokës, ku eshtrat varrosen fshehurazi në një varr të pashënuar.
Bjellorusia, një aleate e ngushtë e Rusisë, shpreson të përfshijë Krieger në një shkëmbim të burgosurish midis Rusisë dhe perëndimit që është diskutuar prej disa muajsh.
Rrëfimi televiziv dukej se ishte krijuar për të ushtruar presion mbi qeverinë gjermane.
“Koha është kundër meje. Në çdo moment ata mund të zbatojnë dënimin. Çdo sekondë pendohem për atë që bëra”, tha Krieger, duke shtuar se nuk e dinte pse qeveria gjermane nuk po bënte përpjekje më të mëdha për të ndërhyrë në rastin e tij.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
