Shtetasja ruse Maria Butina, e cila u burgos në Shtetet e Bashkuara në prill pasi pranoi se punonte si agjente ruse, arriti në Moskë të Shtunën, ku u prit me lule nga babai i saj dhe gazetarët rusë.
"Rusët kurrë nuk dorëzohen", u tha Butina gazetarëve në aeroportin Sheremetyevo të Moskës, në prani të babait të saj dhe zëdhënësit të Ministrisë së Jashtme ruse.
Ajo falënderoi përkrahësit e saj dhe shtoi se ishte e lumtur që u kthye në shtëpi.
Butina u deklarua fajtore në dhjetor të vitit të kaluar për akuzën e komplotit si agjente e huaj për Rusinë, duke depërtuar në një grup për të drejtat e armëve dhe duke ndikuar në aktivistët konservatorë amerikanë dhe republikanët.
Çështja e saj u bë shkak për tensionimin e marrëdhënieveSHBA-Rusi, duke bërë që Moska ta akuzonte Uashingtonin se e kishte detyruar Butinën të rrëfehej për ato që nga Moska u quajtën akuza qesharake.
Në fillim të këtij viti Presidenti rus Vladimir Putin e quajti trajtimin e Shteteve të Bashkuara ndaj Butinës të padrejtë dhe tha se dënimi i saj dukej si një përpjekje e zbatimit të ligjit dhe zyrtarëve amerikanë të gjykatës për të shpëtuar fytyrën e tyre.
Pavarësisht kritikave të tij për mënyrën se si u trajtua Butina, Putini nuk ka plan të takohet me të, tha këtë javë zëdhënësi i Kremlinit Dmitry Peskov.
Në të kaluarën, Putini i ka mirëpritur ngrohtësisht agjentët rusë të arrestuar jashtë vendit.
Butina, e liruar nga një burg në Florida të premten pasi vuajti pjesën më të madhe të dënimit me 18 muaj, nuk e komentoi çështjen e saj para reporterëve në aeroport.
Por në një intervistë për mediat shtetërore ruse të regjistruara siç duket gjatë fluturimit, Butina insistoi në pafajësinë e saj. /Reuters/
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
