Me 75 vota pro Kuvendi ka miratuar ligjin për ndalimin e lojërave të fatit, i cili i hap rrugë mbylljes së aktiviteteve të kazinove duke nisur nga 1 janari.
Deputetët e mazhorancës pas diskutimeve në Parlament votuan në unanimitet ligjin për lojërat e fatit.
Ligji në fjalë u votua pa votat e opozitës e cila kishte paralajmëruar se nuk do të merrte pjesë në Parlament, duke bojkotuar për të disatën herë seancat plenare.
Votimi u përshëndet nga kryeministri Edi Rama. Kryeministri falenderoi deputetët e pranishëm dhe theksoi se me aktorët e Kinoshqupit kemi dhe gjyqet se do paguajnë një më një për shpifjet.
"Kuvendi sapo miratoi me 100% të deputetëve të pranishëm NDALIMIN E BIXHOZiT (kazino elektronike dhe baste të çdo lloji off apo online) në 31 dhjetor. Fjalët mbrapsht shpifësve të çdo kanali e portali, ndërsa me aktorët e Kinoshqupit kemi dhe gjyqet se do paguajnë një më një atë", shkruan Rama në "Twitter".
Ndërsa me 74 vota pro deputetët e mazhorancës rrëzuan dekretin e presidentit për Teatrin Kombëtar. Ndërsa mësohet se Ministri për Diasporën, Pandeli Majko, nuk ka votuar për rrëzimin e dekretit të Presidentit, Ilir Meta.
Ashtu si në dy herët e tjera ku pati dhe përplasje me kryeministrin Edi Rama, Pandeli Majko nuk mori pjesë në këtë votim.
Gjithashtu, Kuvendi miratoi po me 75 vota pro edhe projektligjin për mbrojtjen e të miturve nga alkooli.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
