Prokurorët serbë thanë të hënën se kishin akuzuar pesë vetë për torturimin dhe vrasjen e 20 civilëve, kryesisht myslimanë gjatë luftës së viteve 1990 në Bosnjën fqinje.
Një grup paramilitarësh serbë më 27 shkurt 1993 ndaluan një tren në fshatin Strpci në kufirin me Bosnjen, tha aktakuza.
Ata morën 20 pasagjerë, kryesisht myslimanë dhe i dërguan në Vishegrad në Bosnjën lindore, ku i torturuan dhe i vranë të gjithë, duke i hedhur trupat e tyre në lumin Drina.
Të gjitha viktimat ishin nga zona e Sanxhakut të mbizotëruar nga myslimanët në Serbinë perëndimore, e cila kufizohet me Bosnjën, ku në atë kohë u zhvillua një betejë e përgjakshme ndëretnike midis myslimanëve, serbëve dhe kroatëve.
Një total prej 16 anëtarësh të dyshuar të grupit paraushtarak u arrestuan në vitin 2014 në njësinë boshnjake të Bosnjës ose në Serbi.
Njëmbëdhjetë kanë dalë përpara gjyqit në Sarajevë, njëri prej të cilëve u deklarua fajtor dhe u dënua me pesë vjet burg në vitin 2016, pasi kishte arritur një marrëveshje me prokurorët.
Një anëtar tjetër i grupit u dënua me 15 vjet burg nga një gjykatë në Mal të Zi në 2002.
Udhëheqësi i grupit, Milan Lukiç, u dënua me burgim të përjetshëm nga një gjykatë e OKB-së për krimet e luftës gjatë konfliktit të Bosnjës në vitet 1992-1995, por ai kurrë nuk u akuzua për krimet e Strpcit.
Vëllai i tij, megjithatë, Gojko Lukiç figuron midis pesë të akuzuarve kohët e fundit.
Lufta e Bosnjës 1992-1995 midis kroatëve të saj, myslimanëve dhe serbëve mori rreth 100,000 jetë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
