Pse dozat e vaksinave për foshnjat dhe fëmijët janë të ndryshme nga ato për të rriturit

Sistemi imunitar, i cili na mbron nga agjentët e huaj që mund të shkaktojnë infeksione, zhvillohet gjatë jetës, duke u maturuar në faza të ndryshme. Ky proces është një nga arsyet pse dozat e shumë vaksinave janë të ndryshme për disa grupmosha.

Ky maturim imunitar, siç shpjegohet nga imunologu Brian Peppers në The Conversation, fillon menjëherë pas lindjes dhe, në varësi të evolucionit të tij, sistemi imunitar mund të jetë pak a shumë reaktiv, duke kërkuar një dozë të ndryshme.

“Kur lindim, mbrojtja jonë kryesore imune është për shkak të antitrupave që nëna jonë ndante me ne përmes placentës dhe qumështit të gjirit. Këto antitrupa sigurojnë atë që quhet imunitet pasiv tek foshnjat, ndërsa sistemi imunitar adaptiv (pjesa e sistemit imunitar që do të prodhojë antitrupat - nuk është ende realisht aktiv dhe funksional. Procesi i maturimit fillon menjëherë pas lindjes, por mund të duhen vite që sistemi imunitar të arrijë pjekurinë e plotë”, specifikon Peppers.

Nga ana tjetër, thekson eksperti, kur lindim kemi edhe atë që quhet sistemi imunitar i lindur. “ Kjo nuk ka nevojë të mësojë se si të luftojë infeksionet siç bën sistemi imunitar adaptiv . Pa sistemin imunitar të lindur, ne do të sëmureshim shumë më shpejt dhe më shpesh.

Prandaj, kur studiuesit punojnë për të rregulluar dozën e një vaksine për grupmosha të ndryshme, ata vlerësojnë fazën e zhvillimit të sistemit imunitar të personit për të cilin është menduar, duke optimizuar sasinë e serumit në mënyrë që doza të sigurojë mbrojtjen më të mirë me sa më pak efekte anësore.

Disa vaksina, si ato kundër Covid-19, në fakt janë testuar në doza të ndryshme për të rriturit, adoleshentët, fëmijët dhe foshnjat, përgjithësisht duke filluar nga njerëzit midis moshës 18 dhe 55 vjeç, pasi sistemi i tyre imunitar është i rritur dhe i pjekur, duke lejuar të parashikohet se çfarë mund të ndodhë kur i njëjti formulim administrohet në grupmoshat më të reja.