Pas qëndrimeve të kundërta për emigracionin (sidomos muajt e fundit), Franca dhe Italia kanë një mosmarrëveshje të re. Shkak janë bërë pikturat e Leonardo da Vinçit. Roma thotë se nuk do të lejojë që kryeveprat e Da Viçit të ekspozohen në muzeun e Luvrit.
Nënsekretarja e Ministrisë italiane për Trashëgiminë Kulturore, Lucia Borgonzoni, ka njoftuar se do të anulojë një marrëveshje të nënshkruar nga qeveria e mëparshme, sipas të cilës veprat më të njohura të Da Vinçit i huazohen muzeut të Luvrit në Paris.
Muzeu i famshëm i artit priste që t’i ekspozonte pikturat e da Vinçit në vitin 2019, që shënon 500- vjetorin e vdekjes së tij.
“Kur e zbulova këtë marrëveshje, i thashë vetes: Kjo është akti më i turpshëm i qeverisë së kaluar që prek trashëgiminë kulturore”, thotë Borgonzoni.
Zyrtarja e lartë e Ministrisë së Kulturës, e cila vjen nga radhët e Lega-s, thotë se marrëveshja duhet rinegociuar.
"Ne duhet të diskutojmë gjithçka sërish. Aty ku autonomia e muzeve cenohet, interesi kombëtar nuk mund të vijë i dyti. Francezët nuk mund të kenë gjithçka që kërkojnë", shtoi ajo.
Përplasja për pikturat e Da Vinçit vjen pas tensioneve të shtuara politike mes dy fqinjëve europianë. Matteo Salvini, ministri i Brendshëm italian, dhe Emmanuel Macron, kanë shkëmbyer shpesh replika kohët e fundit në lidhje me çështje që kanë të bëjnë me emigracionin dhe sigurinë kufitare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
